Pathau mik va song tong abih gauk! Bangsa La Ha lac sa dalam dom bangsa takik menuac, dok di dom huyện tapen krong Đà di tỉnh Sơn La song  Lai Châu.  Xã hội dak harei dak tagok, rai duik da kharei dak salih bahrau, min bhap bini urang La Ha jeng dok khik hu dom ilamu di bangsa drei, dalam nan hu adat “Pang a”, lac adat likau patuah jamo. Lường Hạnh, urang vak di rayo sap  ndom VN dok di bhum Tây bắc hu kadha vak khan ka adat ni di mik va bangsa  La Ha daok di bản Tạy,  xã Pi Toong,huyện Mường La, tỉnh Sơn La.

Tuk phun rabung phik dalam glai mblo tagok mbaok haluk, phun mban hadah sambo di dom bhum ceik glong, mik va  La Ha di palei Nà Tạy, xã Pi Toong, huyện Mường La, tỉnh Sơn La peih ngak adat “ Pang a” piah likau ka bilan pala hu siam mekre, pren yava khang kajap, patuah jamo ka bhap bini dalam palei, dar phol dom pô yang, dom gru ieu yang hu buh pren yava khik caga puk palei. Dang tabiak ngak adat lac ong  mo hu angan dalam bhum. Tui hatai sahaneng di mik va, ong mo lac urang pambuak dom po yang song menuac sia, dom urang hu  ong iek abih ruak hu taduan lac anek rong song hu daa mai. Langiu di nan, daok hu dom kapul nyaom karja, mik va dalam palei song dom puk palei jiak tapen mai hu mbaok. Ong mo Lò Văn Pháng daok di palei  Nà Tạy, xã Pi Tong, huyện Mường La, tỉnh Sơn La brei thau:

Adat pang a hu meng lavik saman, min oh lac thun halei jeng ngak, thun halei pala drak njauk, ngak mbang hu ginup meda Meng peih ngak. Ngak adat Pang a piah likau patuah jamo, pren yava khang kajap ka mik va dalam palei. Hulin ngak adat pang a piah ka anek taco mai bui main.

Caga ngak Pang a, po ngak adat sik 2 drei pabui, sa drei piah ngak adat, sa drei piah pok paling muk kei. Dom anek rong di  ong mo hu daa mai ba tui dom pandap bo drei ngak hu yau menuh, da, brah, nduik, klaoh alak, bingu la boh kayau .. piah brei mboh hatai thau dar phor dom pô yang daong ka drei dalam dom thun tapa. Adat bhian hu peih ngak di gian kreih di sang ong mo. Di labik ni, mik va padang phun nêu, phun patei, phun tabau song tual dom drei athur hu pak meng kriem yau: cim brim, ve sầu, anek saih, bingu mạ ( sa janih bingu biak pahe dalam glai), bingu đào, bingu mban... Caga bloh ong mo pok kakuh daa ong muk ong kei yang mebhang angaok langik,yang ceik glai, krong chraoh, taneh riya mai ngak kasanh ka bruk thau dar phor di ong song mik va dalam palei, likau sraong daong ka abih gauk hu rai duik siam mekre, pala drak njauk.

         tuk ong mo meroi bloh, dom anek raong di ong ba gauk parang tabiak dom janih pandap drei ba tui tagok bàn piah ong pok da-a yang mebhang mai mbang saong sraong daong ka anek kamuan hu rilo pren yava, pala drak njauk, kubao limo, menek, ada caih menek bak var...hadei di tuk ngak adat bloh, sa urang daong ka ong mo parabha pandap ka anek taco, yaok urang hu sa pha menuk, sa pok xôi ba nao sang.

Ngak adat bloh, ong mo song mik va dalam palei ba gauk mbang menyum, doh tamia vil val phun nêu, ngan saong dom kadha doh bhap bini, dom lagu tamia yau tăng bu, tamia khăn, tamia chim... brei mboh bruk ngak mbang, pala drak di mik va. Meng adat ni, rilo dam, dara dalam palei ngak krein gauk jeng ayuh sahabah, duah thau gauk bloh hu gu jeng duik jeng pasang . Ong Quàng Văn Chung daok di palei Nà Tạy xã Pi Toong huyện Mường La, tỉnh Sơn La brei thau:

         Adat pang a ni, meyah oh ka pok kakuh dom yang mebhang ye mik va oh ka hu doh tamia. Meng adat ni anek taco palei angaok, palei ala mai bui sambai, jum pataom gauk padang rai duik bahrau, nan ye hu rilo adei saai hu jeng duik jeng pasang meng adat pang a ni.”

 Bhap bini urang La Ha di  Sơn La tuk halei jeng khik ramik adat “ Pang a”  meng rai ni tapa rai deih song mong nan lac bruk njauk ngak di drei. Adat jeng lac tuk piah ka mik va dalam palei mai taom gaok, ndom nyai nao mai, klah rabha ilamu ngak mbang, kak kajap talei jum pataom, jak ba gauk dak padang puk palei trei sil./.                                                                                                   

                                                                                       Lường Hạnh - TTTB