Page mesup tuk peih bruk padang ngak tatua pambuak dua gah takai kraong ấp 18 di xã Tân  Long, ban sit Ngã Năm saong ấp 21 di xã Thạnh Tân, huyện Thạnh Trị, labaih 10 urang dalam kapul ngak tatua di ở xã Tân Long, saong rilo menuac dalam palei hu mbaok ginup. Yaok urang yaok sa bruk ngak, meng yah mbaik tatua kayau klak tal đóng cọc xây giàn piah ngak tatua bahrau.

Kapul ngak tatua di xã Tân Long hu 13 urang jeng lac urang ngak nong, jeng halan hatian ngak saong oh mek jien công. Kayua menek tabiak saong praong tagok meng bhum palei pala, dom urang nan jeng thau cambaih dom kan kandah di bhap bini tuk nao mai di bhum kraong ribaong, rilo anek saih njauk nao tapa meng ghe mbuan hu bala. Kayua yau nan ye, tuk ngak tatua, yaok urang dalam kapul jeng kham merat abih drei piah samar ngak ka nyu salah mbaik tatua yau hatai caong di mikva dalam palei. Ong Thái Văn Chung, sa urang dalam kapul ngak tatua khan lac: 

Băng: Drei nao padang tatua ngak pahla mboh bui sambai lô. Mboh mikva hu tatua nao mai mbuan lagaih drei uan tabuan lô..

Urang sahneng tabiak bruk padang tatua ngak pahla di xã Tân Long lac ong Nguyễn Văn Sáu, daok di ấp 18, xã Tân Long, ban sit Ngã Năm. Tui ong Sáu, mboh palei biak kan kandah dalam bruk nao mai kayua hu rilo kraong ribaong pacang cakak, mikva ngak tatua meng kayau, kreim piah tapa, atau tapa meng ghe biak glaih glar saong mbuan hu bala. Kayua yau nan ye, dalam sa mbang gaok kapul ngak pahla, taom dom urang ngak pahla mai daong ngak tatua ka mikva, ong likau nao tui ngak tatua piah bac megru ilamu saong piah hu taom gaok dom urang ngak pahla piah likau urang mai daong ngak tatua ka palei drei.

Ong Sáu brei thau, labik halei hu rilo menuac caong hu tatua nao mai, ong nao pambuak bruk haong bhap bini pak nan likau adat karja brei padang ngak: 

 Băng:  Karja yaok ribau bruk, habar ngak hu abih dalam dom harei, nan ye caong hu bruk rik daong di palei, di mikva. Bruk hagait ngak hu, ye drei ngak, daok bruk halei ngak oh hu, tuk nan drei meng caik ka karja ngak. Tuk ngak bloh mbaik tatua, mboh mikva, anek kamuan nao mai mbuan lagaih, drei uan tabuan lô.

Ngan saong yaok mbaik tatua, ong Sáu saong dom urang dalam kapul jeng kuhri kuhria biak cambaih laih ka nyu lagaih haong bruk di yaok labik, yau ye tatua glaong hadom piah oh pacang ghe gilai nao mai…. Mbaik tatua ini bloh tal mbaik tatua daih, tal urak ini, kapul di ong Sáu padang ngak hu labaih 40 mbaik tatua dalam saong lingoiu ban sit Ngã Năm.

Di dom bhum palei nao mai kan kandah, mbaik tatua tapa kraong biak hu yaom glaong piah mikva nao mai, dom adei sit nao bac hu mbuan lagaih. Dom mbaik tatua bo kapul padang tatua ngak pahla padang tagok, oh lac palagaih ka bruk nao mai bo daok ndung bak dalam nan hatai anit di dom urang buh pren tame ngak. Amuk Nguyễn Thị Út daok di ấp Tân Trung, xã Long Bình, ban sit Ngã Năm brei thau: 

“Kol dahlak uan tabuan lô, hu tatua nao mai. Anek saih nao bac jeng hu mbuan lagaih, oh daok nao đò abih jien.

Urak ini, kapul daok hu labaih 20 harak đơn likau ngak tatua di mikva grauk labik payua mai, dalam nan hu mikva di tinh Hậu Giang jeng hu payua harak mai likau ngak brei mbaik tatua. Ong Nguyễn Văn Sáu brei thau, kapul caong dom urang ngak pahla daok patui bruk daong jien piah ngak rilo jang dom mbaik tatua brei ka mikva nao mai. 

Meda lac, bruk ngak di kapul padang tatua ngak pahla di xã Tân Long, ban sit Ngã Năm biak njauk iek praong, njauk pok meyaom. Lac urang ngak nong bhian randap haong bruk hamu puh, min meng hatai anit, kapul hu daong ngak ka bruk nao mai kan kandah di palei pala bhum kraong ribaong hu mbuan lagaih, ba bui sambai mai ka rilo menuac./.