Pathau mik va song tong abih gauk! Yaok thun, dalam tuk vak ni, hadei di tuk yuak padai hè thu, urang nong bhum taneran krong  CL  bhian pasiam veik taneh pala padai thu đông, dok ieu lac padai  vụ 3. Thun ni, ia ndik mai avar song tui kuhria mboh dahlau lac ia ndik prong, yau nan ye urang nong di rilo tỉnh ban dalam bhum hu salih tapa rong ikan di angaok mblang hamu salih ka padai vụ 3, kayua ngak padai vụ ni mbuan gaok khat lihik. Tấn Phong- Urang vak di rayo sap ndom VN daok di  tỉnh Hậu Giang hu kadha vak brei thau ka bruk ni:

 Di dom bhum taneh beir  di  tỉnh Hậu Giang dalam tuk vak ni ia daok ndik tame hamu. Rilo sang urang nong dok samar pacang halam taom dar mblang hamu piah palao ikan.  Ong  Trần Văn Lập daok di palei  Bàu Môn, xã Hòa An, huyện Phụng Hiệp brei thau: thun ni tong abih  5 ha taneh di ong oh ngak padai  vụ 3 bo palao rong jiak  10 janih ikan yau ye ikan  hường, chép, mè hoa, tai tượng, rô phi, lóc , trê, sặc rằn… 

 “ Ikan chép, ikan  mè palao di hamu dahlau , dok ikan sặc rằn, ikan hường, ikan padoc  ye rong prong hasit  bloh  palao  nyu meng hu, dok palao nyu tuk daok sit lo nyu khat . Thun ni, mik va palao biak bui sambai, ia prong ye phù sa rilo,  ikan samar prong lo”.

Dok ong Lê Thanh Tuấn di palei  Phương Thạnh, xã Phương Bình, huyện Phụng Hiệp klaak abih phun padai  vụ 3 salih tapa rong ikan dalam hamu meng dom thun ni mai di angaok taneh prong labaih 1 ha taneh hamu. Ong brei thau: Bhian di nyu ikan rong tui jalan ni oh abih jien blei pandap mbang, kayua ikan mbang  vi sinh vật dalam ia song padai  tamuh tagok meng gha di vụ padai hè thu. Dom thun tapa, hadei di 3 bilan rong, tuk ia trun , cap ikan pablei, ong laba hu  meng  12 tal 15 triệu đồng. Bruk njauk biai nan lac rong ikan di angaok hamu ye hu rilo tuk vak piah ngak bruk karei duah jien. Dom harei dahlau, ong Tuấn bahrau palao labaih  30 kg ikan dom janih trun hamu. Thun ni, tui kuhria ia ndik khang yau nan ye ong  Tuấn cong lac meda hu sa vụ ikan biak rilo.

“  Bruk rong ikan ni nyu kein di labik lac drei oh abih jien blei pandap mbang. Tuk lahaiy ye  drei nao  duah baoh bao, hu tuk mik va nao chap ikan atau nao ngak  hồ duah jien raong sang.”

Ong Trần Văn Tuấn- Trưởng phòng ngak nong song patagok palei pala  huyện Phụng Hiệp brei thau: Lac labik taneh biar, nan ye pala padai  vụ 3 bhian oh hu liba  . Kayua yau nan ye, dom thun tapa rilo boh sang urang nong klaak phun padai vụ 3 piah salih tapa rong ikan angaok hamu padai biak jak jeng. Thun ni, ia ndik prong song mai avar jang yaok thun jiak sa bilan, yau nan ye, mblang taneh rong ikan  angaok hamu di labik ni dak harei dak rilo jang. Urak ni, urang nong palao rong  labaih 1.200 ha song tui kuhria, dom harei anak tal bruk ni tagok labaih  2.500 ha. Langui di huyện Phụng Hiệp, di dom bhum taneh beir karei dalam tỉnh Hậu Giang yau  huyện Long Mỹ, Châu Thành A, jeng hu yaok ribau  ha taneh hamu hu urang nong palao rong ikan bo oh ngak padai vụ 3.  Ong Trần Văn Tuấn daok brei thau lac:

Tuk bhap bini rong ikan  di angaok mblang hamu  yau nan nyu hu rilo kein lagaih. Ka sa lac takik abih jien. Ka dua lac cakak hu halak halin meng vụ ni tapa vụ deih. Tal tuk pala padai  đông xuân ye urang nong klak hu bruk ngak haluk song urang pala drak padai đông xuân di tuk vak nan.

Meng livik mai, dom urang ilamu oh njauk hatai song bruk ngak padai  vụ 3. Kayua lac ngak  3 vụ padai /sa thun gam ngak ka taneh samar thu lagu, urang nong mbuan gaok rilo khat lihik kayua hajan ribuk, biak mbuan  gaok ia sua, mùa vụ khat lihik. Min, rilo urang nong yaom lac oh khin min brei ngak padai vụ 3, kayua oh pala padai ye kan duah hu jien. Bruk rong ikan angaok hamu tuk ia ndik mai gam duah hu jien, gam ba mai rilo kein lagaih karei daok peih ka urang nong tabiak truh bruk havil akaokngak padai vụ 3./.