Pathau mik va song tong abih gauk !  Huyện Châu Thành, tỉnh Long An hu rilo urang thau tal lac labik pala thanh long hu chất lượng dhi 1 dhi 2  dalam negar. Thanh long Châu Thành hu kanduh sambo hồng, ralo yamen, hu pala tui tanut chuẩn VietGAP, GlobalGAP. Thanh long Châu Thành hu mbaok di rilo darak pasa negar langiu hu angan lac kan tame  yau  Nhật Bản, Australia...Dom thun jiak di ni, meng boh thanh long pablei tabiak negar langiu, urang pala thanh long di Châu Thành padang hu sang danaok khang kajap, siam mkere, blei hu ginup pandap panda , rai duik hu tagok biak rilo. Daa mik va song tong abih gauk gam song Vinh Quang, urang vak dok di ban raya  HCM mai rivang bhum palei pala thanh long Châu Thành: 

        Dok dalam boh sang bahrau siam song rilo pandap bahrau blei, ong Trần Văn Năm, xã Long Trì, huyện Châu Thành chreih chrai khan ka rai duik urang nong di drei. 10 thun dahlau, angaok 1 hecta taneh daok hu, ong ngak padai song pala njam glaih glar luac thun, min tok ginup mbang. Hadei di rilo mbang sahaneng kuhria, ong tabiak tal tỉnh Bình Thuận bac megru bruk pala thanh long. Mai veik palei, ong Năm khang hatai salih meng ngak padai tapa pala phun  thanh long ralo mbong patih. Labaih 3 thun hadei, meng di vụ cmereip, yaom lac yaom kaom oh tani tanat, labik pablei jeng oh ka tani tanat, min ong jeng hu laba. Tapa nan nyu pachreih ong kak kajap haong phun  thanh long mbiah tal harei ni. Lavik livik harei, thanh long Châu Thành hu pablei tapa rilo taneh ia, jien laba jeng hu rilo jang, rai duik sang ong song rilo sang karei di huyện Châu Thành ni hu salih bahrau mboh di anak meta. Vụ thanh long meng bloh , meng labaih  1 hecta min sang ong  jeng hu laba labaih 500 triệu đồng. Piah pala  thanh long hu kein laba khang kajap, ong Năm song mik va labik ni dok kham padang angan ka phun thanh long di puk palei drei. Ong Trần Văn Năm khan lac:

Khol hulin dok sangka tal pajaih, urak ni dok pambuak bruk song

Viện phun mbang baoh gah merong piah duah janih pajaih siam jang, takik ruak jang. Bruk  praong abih urak ni lac pala Thanh Long tui tanut  chuẩn VietGAP dok hu mik va mong lac bruk dang akaok piah ngak  yau habar khol drei pablei tapa hu dom darak pasa kan tame di abih. 

Jang yau ong Trần Văn Năm, ong Lê Đắc Vinh daok di  xã Dương Xuân Hội, huyện Châu Thành, bui sambai tuk thanh long  pala njauk saong pablei hu yaom. Yaom meng  45 tal  50 ribau đồng/sa kg, labaih 1 hecta thanh long tai meriak tapa  2 vụ hub a mai ka sang ong Vinh labaih  1 tỷ đồng. Dom thun ni mai , meng  thanh long bo sang ong Vinh langiu di bruk ngak hu sang danaok siam mekre dok blei hu radeih xe  hơi, radeih tải. Ong Vinh halan hatain tacei ka rilo urang nong karei dom ilamu pala thanh long song cong khin ngak kaya meda di angaok bhum palei drei. Ong Lê Đắc Vinh lac: 

        Rai duik mik va urak ni biak tani tanat, ginup meda, yau di tuk vak ni yaom thanh long tai meriak meng  45 tal 50 ribau đồng sa kg, ye yaok kg mik va laba  hu 40 ribau đồng. Mbang thanh long truac gom puac thun ni hu 10 tấn hu yaom ye mik va hu laba labaih 400 triệu. Bo yaok thun 2 mbang mik va halei pablei hu yaom ye  laba biak glong.)

         Abih huyện Châu Thành hu labaih  20 ribau boh sang urang nong pala jiak  8 ribau hecta thanh long. Taeng thun  2017, sản lượng thanh long di  Châu Thành hu labaih  20 ribau  tấn, jeng sa janih boh kayua khang ba mai kein laba kinh tế glong. Bruk pala thanh long patagok dui tui dom bruk ngak mbang karei yau tame kadung, pajeng ba... tagok tui. Tuk vak jiak di ni, boh thanh long oh lac ba mai rai duik ginup meda ka urang nong bo dok ba bruk ngak, ba jien tame tani tanat ka yaok pluh ribau urang ngak. Rai duik ginup meda jang, urang nong halan hatain pambuak song karja ngak jalan palei, ngak tatua, bilai y tế, jalan ia hacih.  Tal tuk vak ni , hu  9/12 xã di  huyện hu pok brei angan xã palei pala bahrau song huyện hu pok brei angan lac huyện palei pala bahrau dalam thun ni . Ong Võ Thanh Hồng, Phó Chủ tịch Ủy ban bhap bini  huyện Châu Thành brei thau:

        Thun  2011 boh sang kan labaih 5% urak ni trun dok  1,9% . Urak ni sang danaok mik va kaya meda abih, hu tivi LCD, jamriak liar ,  xe hơi... pandap panda ginup abih , sang halei jeng praong, siam. Rai duik mbang ngui daok dang hu tagok biak rilo dut song dahlau deih. Yau nan ye, mblang taneh halei pala hu thanh long ye hu pala abih,  meng dom xã tal ban sit.).

         Piah pala thanh long hu kein laba khang kajap song dak harei dak tagok , tỉnh Long An dok peih ngak Đề án patom abih bhum pala thanh long tui jalan pandar công nghệ glong,  ginup tanut  chuẩn piah pablei tapa dom darak pasa kan tame. Urang nong pala  thanh long dak harei dak sangka tal pajaih , công nghệ song hu mbaok tame dom hợp tác xã piah pala prong, jak gauk peih tabiak jalan ngak suia lavik. Ong Lê Văn Hoàng, Giám đốc Sở ngak nong song patagok palei pala  tỉnh Long An lac: 

          Meng bruk dong di  Sở ngak nong song patagok palei pala tỉnh song bruk duah thau ilamu di mik va urang nong, dalam tuk vak anak tal boh thanh long huyện Châu Thành, tỉnh Long An pablei tapa darak pasa EU song dom negar hu tanut chuẩn biak catang krei karei . Khol hulin jia lac meng bruk khang hatai di gah ngak nong, urang pal akaok huyện song bruk sa hatung hatai di mik va urang nong meda ngak hu bruk ni.

           Tapa bloh dom harei kan kandah, glaih glar, phun thanh long dok ba mai rai duik trei sir, ginup meda ka urang nong Châu Thành. Jia lac, meng hatai khin ngak mbang prong, ngak tabiak kaya nong hacih, pabak cong khin di darak pasa, abih di nyu nan lac darak pasar negar langiu, urang pala thanh long tuk halei jeng hu mbang tết ginup meda./.