Kreih bilan thu, dalam tuk tong abih bhum taneh pala tabau dok thu lagu ye dom bein phun mbang boh di dom boh sang daok di xã Cư An dalam bhum Núi Đá Lửa daok hadah tagok meng sambo hajao. Dang tapen dom phun quýt đường bak boh, daok cang paik pablei, ong Phạm Văn Đông, xã Cư An, bui sambai brei thau, bahrau yam tame thun ka 3 min bein quýt di ong hu năng suất biak glong, yaom pablei siam, tui kuhria meng  20.000-30.000đồng/kg, hu tuk tagok tal 40.000đồng/kg. Quýt siam nan ye  urang mai duah tal bein piah blei, boh sang ong oh pajeng nao halei piah pablei. Tui  ong Đông, pajaih quýt đường ni  ong blei di gah merong song abih rilo pren yava duah thau ilamu piah pala 

 “Taneh di lin lac taneh patau, pala tabau oh hu, bo pala njam patam ye khat, nan ye hulin salaih  phun pala. Salih janih phun pala yau ni mboh hu kein laba. Bruk ni dahlau di abih lac phun jien, song kỹ thuật tra, oh thau kỹ thuật ye drei oh ngak hu. Drei blei tapuk mai iek bloh pang Rayo tacei pato drei ngak”.

  Gam song  quýt, angaok taneh prong  3,5ha, ong Phạm Văn Đông pala rilo phun mbang boh karei tra yau bơ, na, kruac bungi, cam. Bruk pala rilo janih phun dong ka ong duah hu jien tani tanat luac thun  meng 350-400 triệu đồng yaok thun.

   Atah di bein phun mbang boh di ong Đông oh hadom lac bein na prong  3ha di sang saai  Ngô Văn Tiến. Saai Tiến lac sa dalam dom boh sang nao dahlau dalam bruk salih janih phun pala di xã Cư An. Dahlau deih, di angaok bhum taneh ni, saai Tiến pala phun tabau song phun tamekai min kein liba  beir saong oh tani tanat. Nan ye saai khang hatai salih tapa pala paaok min oh jeng kayua kurang  ilamu kỹ thuật. Khang hatai salih tapa pala phun mbang boh, saai Tiến abih jiak 2 thun tame gah merong bac megru ilamu, tuk mai veik sang, sa-ai khang hatai pala phun nan. dalam 10 thun tapa, bein na di saai tamuh siam, tani tanat saong mek jien tame hu rilo.

Bein na ni hu 10 thun ye, hu dom phun hu 7 thun. Tuk vak camereip iek glang dalam labaih 3 thun ye hu boh. Tuk  hu baoh rilo ye sa thun drei mek tame hu meng 300-400 triệu đồng jien piah ngak ye 40-50 triệu đồng. Dut song phun tabau ye phun na ni  kinh tế glong jang  2-3  mbang.”

  Cư An lac xãngak nông song taneh pala drak prong jiak  2.700ha. Dalam xã, mik va rilo meng pala dom janih phun katut harei yau tabau, bei blom, tangei atau tamekai , kein laba kinh tế bier. Meng nan, rilo boh sang di labik ni khang hatai mesraiy phun jien, salah tapa pala dom janih phun mbang boh yau kruac bung, cam, quýt atau na, bơ, durieng. Bruk salih ni tuk camereip ba mai kein laba kinh tế song taneh pala phun mbang boh di labik ni hu jiak 100ha. Ong Đỗ Quang Hoàng Hiệp, urang jakar ngak nong  xã Cư An, huyện Đăk Pơ, tỉnh Gia Lai, brei thau,  taneh pala phun mbang boh di  xã dok tagok kayua karja xã song huyện dok hu sarak dong ka urang nong ngak mbang pala drak.

 “Peih ngak danak dak palei pala bahrau, salih phun pala ye thun 2017, meng kadung jien karja  huyện hu brei ka  10 boh sang mesraiy, pambak prong bruk pala  phun na. Taphia di nan, mik va jeng khang hatai salih phun pala, dom janih phun yau  bơ sáp, phun kruac bung klik hajao, dirieng, min khang di abih lac phun na.”

  Khang hatai salih janih phun pala, kham merat bac megru ilamu piah ngak tui, dok ba mai kein laba cambaih laih ka rilo boh sang di  xã Cư An, huyện Đăk Pơ, tỉnh Gia Lai. Ni lac dom bruk ngak gheih, njaukpambak prong dalam tuk gah ngak nong di puk palei dok gaok rilo kan kandah yau urak ni./.