Gah ngak nong tỉnh Ninh Thuận hu quy hoạch tui jalan patagok  dom janih phun đặc thù, dong ka urang nong patagok kinh tế, patagok jien mek tame. Angaok dom bhum taneh cuah prong pandiak di Ninh Thuận, urak ni hu tamuh tagok rilo trang trại phun đặc sản tamuh hu dalam pandiak daok hajao mekre. Trang trại măng tây xanh di Hợp tác xã măng tây xanh palei  Tuấn Tú, xã An Hải, huyện Ninh Phước kayua ong Hùng Ky, sa urang nong Chăm ngak chủ nhiệm ngak ka  urang mboh tatuak drei kayua nyu praong tal jiak  40ha, samu labaih 80% taneh pala  măng tây xanh di tỉnh.

Măng tây lac janih pandap mbang hu rilo dinh dưỡng, meda pala hu di angaok taneh meluk cuah njom mbak, lagaih song langik tasik taneh riya di labik ni dok hu urang blei mbang dalam song langiu taneh. Urang nong Ninh Thuận pala di taneh cuah biak kan kandah, abih di nyu nan lac dom thun pandiak bhang. Sang ong njauk kuac bingun piah mek ia pruh, me-om hajao bhum taneh cuah, meng nan hu jak jeng”  ong Ky khan lac yau nan.. Tui kuhria yaok  ha măng tây xanh dalam tuk vak kaoh mek, urang nong hu liba labaih 200 triệu đồng/sa thun. Pala  măng tây xanh hu jien mek tame glong, hu biak rilo boh sang urang nong di labik ni dok salih tapa pala janih phun ni, nan ye taneh pala dak harei dak peih prong. Urak ni  măng tây xanh hu pala rilo di  Phan Rang – Tháp Chàm; huyện Ninh Phước, huyện Ninh Hải.

Langiu di măng tây xanh, mik va daok di dom huyện njauk pandiak bhang jeng dok  patagok bruk  pala medar  cao sản. Medar hu pala jeng mejam , boh prong, mbang jamen song boh rilo. Kayua mbuan pala, paik boh luac thun, hu yaom kinh tế glong, yau nan ye bruk ni samar hu mik va urang nong salih ka dom janih phun pala takik kein liba. Sang  ong Quảng Đại Huynh daok di palei  Phước Đồng 2, xã Phước Hậu huyện Ninh Phước yaom lac bahrau ba  1 sào taneh  (labaih 1.000 mét vuông) tame pala medar  cao sản, min hadei di 1 vụ paik boh liba jang 3 mbang  pala patei. “Meyah dut pala patei haong pala medar, kein laba meng pala

medar  glong jang 3-4 mbang patei, yaok sào pala medar duah hu  31 triệu đồng/vụ”, ong Huynh brei thau.

-Nhạc ngắn

Dalam tỉnh Ninh Thuận urak ni hu labaih  1.000 ha pala medar , rilo meng lac di dom huyện Ninh Phước, Ninh Hải, Thuận Nam, Ninh Sơn song ban Phan Rang - Tháp Chàm. Dalam nan, taeng huyện Ninh Phước meblah labaih meteh mblang taneh  . Karja dong ba pajaih, khak drak, ilamu kĩ thuật ka dom boh sang urang nong taduan khik iek glai, piah pala dom janih phun mbang boh yau papaok blait, panah, kanduik, măng cụt, chôm chôm pablak ala halui glai, patrun patakik dom kanjah jhak meng pandiak bhang, tagok jien mek tame. Ong Hoàng Văn Thanh, sa urang nong taduan khik iek glai di palei Long Hòa, xã Long Sơn huyện Ninh Sơn brei thau, vụ meng bloh, sang ong duah hu 30 triệu đồng meng bruk pala tangei, 60 triệu đồng meng pala paaok blait, dalam tuk dahlau deih, pala dom janih phun meng kan jeng khat abih. 

Kadha “urang ngak hamu cong thau” adit ni tal ni likau padeih. Danak dak ni kayua rayo sap ndom  VN pambuak bruk song pasak pachreih nong pakat negar  ngak tabiak.