Atah di ni labaih 1 thun, sang ong Võ Này daok di palei Mỹ Tường 1, xã Nhơn Hải, huyện Ninh Hải dok dalam sang taik tahah. Mboh sang ong biak kan kandah, puac  thun 2017, Kapul kapul urang kamei meng kan xã Nhơn Hải hu dong 7 triệu đồng meng jak ba dom urang ngak pahla song meng kadung jien di kalup kapul. Meng bruk dong tuk camereip ni ngan song pok jien dong 30 triệu đồng meng kadung jien kayua urang kathaot di tỉnh Ninh Thuận, ong Võ Này ngak hu sa boh sang siam mekre khang kajap. Meng harei dok dalam boh sang bahrau, sang ong biak bui sambai song yau hu pabak pren  piah yam tagaok dalam rai duik.

 “Tuk padang sang ni tagok ye gah kapul urang kamei di xã hu  dong padai brah song dong jien piah ngak sang danaok, karja  jeng hu dong phun jien piah padang ngak sang, biak thau dhar phor kalup kapul urang kamei di xã song karja sangka dong ka boh sang.

          Lac sa  xã ngak nong, rai duik di bhap bini pagam pambak tame bruk ngak nong song pablei salih sit, min rilo boh sang kurang phun jien piah pala drak song pablei salih. Kayua yau nan ye, dom urang dalam kalup kapul urang kamei meng kan di  xã hu pambuak bruk song karja  xã pasang iek, padang angan dom hội viên kathaot, kan kandah song dang tabiak tín chấp haong gilang pariak sarak karja tỉnh piah urang hội hu mesraiy jien abih tih lac labaih 500 tỷ đồng. Meng hu jien nan, dom thun tapa, rilo sang di xã hu rai duik mbiah ginup jang, hu peih prong bruk ngak mbang, pala drak. Saai Nguyễn Thị Lụm daok di  xã Nhơn Hải, huyện Ninh Hải brei thau:

 “Dahlau deih adei gaok bala jeng hu kalup kapul urang kamei xã brei jien piah iek ruak, tuk mai sang dok hu kalup kapul dong brei mesraiy dom pluh triệu đồng, piah pablei salih boh kayau dalam pasa, meng nan ginup mbang tapa harei. Adei ndua dhar phol kalup kapul urang kamei biak rilo hu dong brei, dong ka sang adei jang yau rilo sang kan dalam xã”.

          Hu padang tagok meng thun  2009, tuk camereip, Kalup kapul urang kamei meng kan xã Nhơn Hải hu  25 saai, urak ni hu labaih 50 saai. Yaok bilan, yaok saai rik 20.000 đồng tame kadung jien ka Hội ngak bruk, taphia nan, dom urang ngak pahla jeng hu dong, tal urak ni phun jien di kalup kapul hu labaih  75 triệu đồng. Tapa nan, kalup kapul hu dong ka rilo adei saai hu mesraiy jien piah ngak mbang, pala drak, pablei salih. Yaok bilan, Kalup kapul dok hu buh tabiak labaih 1 triệu đồng piah blei brah song dom  nhu yếu phẩm dong ka dom sang kathaot, urang taha daok sa drei dalam xã. Amuk Phạm Thị Hiệp, Chủ nhiệm Kalup kapul urang kamei meng kan xã Nhơn Hải, huyện Ninh Hải, Ninh Thuận ndom lac:

 “Anak tal dom adei saai dalam kalup kapul urang kamei di  xã Nhơn Hải khol hulin ba abih pren yava di drei piah ngak dom bruk siam, bruk pahla dong ka mik va kan kathaot di  xã. Khol hulin cong khin karja labik ni song kapul urang kamei di huyện song  xã dong ka khol hulin rilo jang piah khol hulin ngak bruk hu siam jang” 

           Mô hình Kalup kapul urang kamei meng kan ni oh lac patagok hu labik dang di urang kamei prong thun dalam dom bruk xã hội, bo yaok urang dalam kalup kapul tuk halei jeng lac dom urang biak kham merat ngak dom bruk pakacah gauk anit ranam taneh ia di puk palei./.

                                                   CTV Văn Cảnh - Phan Thanh/VOV-TPHCM