Meng tuk ndih tapui tabiak tal tuk metai nao, urang Jarai hu takik abih dua, klau adat cúng pren yava. Adat bluh tanye lac adat hu peih ngak akaok meti dalam rai di urang Jarai. Tui jien ndo di yaok baoh sang, mikva ngak adat bluh tanye piah likau patuah jamo, caik angan ka anek kamar barau ndih tapui saong thau dhar phon dom pô yang, likau ka anek naih hu khang kajap, jat gheih, jeng anek siam di baoh sang saong bhap bini. Urang vak di rayo sap ndom VN hu kadha vak khan ka adat bluh tanye – ilamu hadah krah di urang Ja rai daok di Tây Nguyên.    

Tui saai Siu H’Nưn, daok di  Plei Chôt, ban sit Sa Thầy, huyện Sa Thầy, tỉnh Kon Tum, adat bluh tanye lac adat biak praong ka sa urang barau ndih tapui dalam baoh sang, gam lac bui sambai, gam lac trách nhiệm, payua hatai caong khin dom po yang khik caga saong pato pakai anek bhik praong tagok.

“Adei sit hadei di tuk ndih tapui tabiak, dua, klau harei urang meng kak ché alak, cap menuk, pabui, atau limo tui jien ndo di yaok baoh sang, ngak adat bluh tanye saong caik angan. Sang halei kaya ye ngak praong, menyum alak chreih chrai; sang halei kan kandah ye kak ché alak saong drei menuk jeng hu. Caong khin anek naih thau pang, thau ndom saong jat gheih hadei ini. Likau ka anek naih praong samar, hu pren yava khang kajap”.

         Dahlau daih, urang kamei Ja rai bhian ndih tapui di sang, hu muk mbui. Ndih tapui bloh, sang peih ngak adat bluh tanye piah caik angan ka anek, thau dhar phon muk mbui, tadhau ayuh siam mekre ka baoh sang saong anek naih. Dalam rai diuk urak ini, mikva hu thau tal blai y tế nao iek ruak saong ndih tapui. Min, meng makna siam mekre yau nan, adat bluh tanye jeng daok hu peih ngak.

Bruk njauk biai nan lac iek tui jien ndo bo sang palih ruah tukvak, ngak praong atau sit adat bluh tanye ka anek naih. Hu labik ye mikva peih ngak adat tuk anek kamar ndih tapui hu sa adit, atau tuk anek kamar thu pasak saong ngak adat caik angan ka anek. Meyah sang kan kandah, tal tuk anek thau rui, atau thau nao, amaik ame meng ngak adat bluh tanye, caik angan.

Amuk Nay H’Tang, daok di Plei Tel A2, xã Ia Sol, huyện Phú Thiện, tỉnh Gia Lai, lac urang bhian ngak muk mbui saong ngak adat bluh tanye ka ralo anek naih, brei thau bruk ngak adat bluh tanye yau ini: “Urang caga sa drei menuk, ché alak cần; anek likei ye menuk tano, anek kamei ye menuk binao gam ché alak. Drei menuk hadei tuk sik, urang ruah tabiak dom janih dalam drei menuk, yau tai, jai, ralo, pruac, drah… taong abih hu buh tame canaih sit, tauk hala kayau hacih. Alak ye tuh tame panyil ban piah ngak adat bluh tanye.  Muk mbui, gru cúng mai brei patuah jamo; likau yang daong khik caga anek kamar. Urang oh var ieu dom yang ong muk, ong; yang timur yang pai, yang glai, craoh kraong; yang ndih tapui khik caga anek menuac… tuk cúng, urang ba anek kamar tabiak pok, pah sit sit di rup , di cada, di rung adei saong yuk tame tanye”.

Amuk Kpă H’Bian, daok di Plei Tel A2, xã Ia Sol, huyện Phú Thiện, tỉnh Gia Lai, brei thau: “Tui adat cambat klak, drei brei caga melei tra, ché alak, drei menuk, brah saong oh kurang hu panyil ban piah caik alak lai darah menuk hiến sinh. Tuk muk mbui, gru cúng hu mbaok urang ieu amaik ame pok anek kamar tabiak daok la anak pandap piah gru cúng. Amaik ame anek naih daok la anak, nan lac gah tamur di pandap, daok gru cúng ye daok gah pai di pandap”.

  Ini lac panuac cúng di taha palei Ơi H’Pơnh, palei Bôn Ling, xã Ia Hiao, huyện Phú Thiện, tỉnh Gia lai di mbang ngak adat bluh tanye: “’Hỡi dom po yang, kol dahlak pok tagok dom yang meng alak yamen, alak mesam; ralo pabui , ralo menuk, khin bluh tanye ka nyu, caong dom yang khik caga, raong ba nyu. Kol dahlak kak ché alak klau, alak lime piah pok tagok ka yang daong mbui, yaong daong iek nyu, caong hadei di ini urang dalam sang nao puh tagok hamu, amaik nyu blah njuk, mek ia oh tavak tavaiy hagaih; lika ka anek naih hu kajap karo, umo atah. Nyu praong tagok hu ame nyim nong ia, amaik nyim nao puh; rup nyu hu khang kadang, menyum alak, me-in sambai saong  urang oh njauk alak ngak mebuk, oh njauk kamot pacuh ngak bruk jhak. Ini lac, dom janih alak bingi, ralo pahe pok tagok dom po yang piah hadei di ini, tabiak kraong, trun craoh; tame glai tagok ceik, yaom lac lingik li-ar atau pandiak, hajan atau pandiak, tuk halei jeng hu dom po yang khik caga ka nyu luac rai”.

Meroi bloh, gru cúng sah sit sit tame akaok, tame cada, tame rung, tangin takai  di anek naih, bloh bluh tame tanye nyu. Ngak bloh adat, gru cúng daa muk mbui menyum dahlau, tal amaik ame anek naih, bloh tal mikva but pajaih, puk palei gam menyum bui sambai saong baoh sang. Tapa adat bluh tanye, urang Ja rai jia lac, anek naih tuk halei jeng hu khang kajap pren yava, jat gheih, jeng anek menuac siam ka baoh sang, ka bhap bini puk palei./.