Thun halei jeng yau nan, but pajaih di baoh sang Gru Hán Dậu jeng ngak adat cúng lisei ka amuk akei mai pataom mbaok haong anek taco tuk thun bahrau tal mai. Taong abih anek taco dalam but pajaih thei jeng hu rik daong, ba brei dom janih pandap piah ngak jeng dom kaya mbang meng kan di bangsa piah cúng amuk akei. Sa-ai Đàng Năng Trung, daok di palei Hữu Đức, xã Phước Hữu, huyện Ninh Phước, tỉnh Ninh Thuận daok brei thau lac: Pandap piah cúng lisei di sang Gru tuk halei jeng hu pei nung, Sakaya, Gi nòng Ya, bánh ít, patei, baoh kayau, har yamen saong oh kurang hu ada, menuk. Pandap cúng amuk akei hu caik angaok salao glaong, tauk hala patei saong caik angaok blah ciew cói. Gru cúng payeng mbaok gah pai, anak mbaok lac talam salao pandap cúng. Tui hatai saneng di urang Cam, gah pai lac labik ong amuk, ong akei mai uan raok thun bahrau haong anek taco dalam sang.

Gru Hán Dậu, urang mong iek kalan Pô Nưgar lac: Lambaok ka but pajaih, gru daa ong akoak ong akei mai mbang menyum dom janih pandap kayua anek taco paling tagok. Caong khin ong amuk, ong akei daong brei pren yava, ngak mbang ginup meda, anek taco nao bac jeng manuac jeng urang, mikva dalam palei jap karo salamat. Dalam adat cúng lisei, urang Cam tuk halei jeng caong khin hu dom siam mekre mai ka sang drei, ka but pajaih saong palei negar. Hadei di nan, taong abih manuac urang dalam sang daok veik haong gauk mbang menyum dalam bui sambai uan raok thun bahrau.

Kayua ngak mbang duah jien, dom anek kamuan urang Cam bhian nao ngak mbang atah. Dom urang ini tok hu pataom mbaok gauk dalam dom harei lễ, tết. Langiu di Katê, Ramưwan, ye harei Tết Nguyên Đán jeng lac tukvak piah ka taong abih manuac urang dalam sang mai taom gaok gauk./.