Na Hang lac sa huyện bhum ceik di tỉnh Tuyên Quang. Labik ini hu 16 bangsa adei sa-ai diuk rai. Yaok bangsa jeng hu dom ilamu siam gheih karei di gauk min tuk halei jeng daok dalam talei jum pataom gauk. Dalam nan, adat lakhah di urang Dao bhong daok di Na Hang hu dom ilamu biak gheih karei.

  Likei kumei urang Dao bhong daok di Na Hang tal tuk praong jeng dam dara hu quyền nao duah payo tui hatai di drei. Meng kan dom panuac daoh dam dara lac jalan piah ka dam dara Dao bhong duah ayut ka drei. Panuac daoh nao mai biak bingi pang samar nyom tame baoh hatai di urang drei anit. Rilo urang hu jeng diuk jeng pasang tapa dom mbang daoh yau nan. Urang meda daoh dam dara di tapen jalan nao, di kreh darak, atau dalam dom harei nyaom di palei, anit gauk meng meta maong, meng panuac daoh yamen la-ar bingi pang. Meng nan hu jeng diuk jeng pasang.

Nan lac urang  randap gauk tapa dom bruk bui sambai. Sa-ai Triệu Thị Nhất daok di Na Hang, Tuyên Quang daok brei thau lac, urang Dao bhong palei sa-ai daok hu adat iew ayut ngak randap. Meyah sa urang likei dam nao palei karei mein. Thau hu bruk nan, kumei dara palei nan paguon gauk pataom tui nyaom kapul mai sang main. Tapa duah thau, tangi sua, mboh takre blaoh ngak randap.

Min sa-ai Nhất lac, oh lac iew blaoh randap hu, hu urang ngak menuk meneng kan, ye kapul ayut dang langiu daoh tame palua. Meyah pang mboh njauk hatai, urang tagok meyai ndem dalikan.  

Tuk mboh anit ranam gauk, dua ayut dam dara nan brei khan ka amaik ame thau. Amaik ame dua gah hu taom gaok meyai, meyah pabak hu pandap likhah ye ngak likhah  ka dua urang nan. Pandap lakhah hu 60 tal 120 jien pariak patih, alak, pabui, manuk, brah piah payak palei. Rilo sang oh pabak hu pandap lakhah ye brei ka anek likei nao ngak metau gah kumei, tal tuk halei sang hu jien padai meng ngak likhah. Sa-ai Triệu Thị Nhất brei thau: pandap lakhah brei hu meng 60 tal 120 jien pariak patih oh njauk lac sang halei jeng hu. Nao daok gah sang diuk  bhian lac dom urang sang kan rilo atau sang hu rilo anek likei atau sang gah kumei oh hu likei. Brei daok yau nan tal tuk anek likei, anek kumei praong atau nao tok diuk tok pasang bloh urang meng ngak likhah jeng hu. Urang  ngak sit tui adat khan brei ka  mukkei thau anek metau min. Sang halei oh hu jien ye brei daok gah kumei dom thun hadei meng lakhah jeng hu. Jeng hu mboh, hu urang anek praong meng ngak likhah.

          Yau nan  min, sa-ai Nhất daok khan lac, tuk hu dua gah sang likei kumei njauk hatai urang likei dam meng hu tapa sang kumei daok ngak metau. Daok dalam tuk vak duah thau gauk bo anek kumei nyu metian, ye dua urang nan njauk palei phạt. Njul ye brei ngak drei pabui, manuk piah rao palei. Trak ye njauk pateok tabiak truh palei./.