-Ông Quảng Văn Đại, sa urang roh duah ilimo mengkan Cam daok pak xã Phước Hậu, huyện Ninh Phước, tỉnh Ninh Thuận, ndom lac, dahlau di tuk urang Cam tame pala drak ye bruk akaok mereip njauk ngak lac ruah harei siam, harei patoah jamo. Hu yau nan bruk pala drak meng siam lagaih. Bhian lac dalam dua harei, harei But saong harei Car, min njauk lac harei chẵn, harei oh kỵ meng ieu yang hu.

-Tuk ruah hu harei bilan siam ye bruk patui di nan lac likau dom po yang hu liua di angaok hamu di sang, di but pajaih. Tui hatai sahaneng di urang Cam, hamu nan daok hu po yang khik iek, yau nan ye dahlau si liua urang njauk ngak adat likau po yang, po taneh di libik nan. Ieu lac adat trun li-ua. 

-Hadei di tuk likau dom po yang  khik iek hamu nan blaoh, bruk patui nan lac ngak adat klaik gai li-ua. Mehit tal baoh panuac “klaik”, urang meda sahaneng tal sa bruk ngak jhak, min tui ông Đại lac oh njauk yau nan. Adat ini piah likau Yang daong piah trun li-ua, pala drak.

-Ông Quảng Văn Đại brei thau, dalam taong abih dom adat ngak nong jeng brei hu mbaok di dom halau janeng saong gru ieu yang. Pandap ieu yang oh meda kurang hu lac pabe, alak saong baoh kayau.

-Dalam chu kì cakrok di phun padai ye tuk padai sroh lac tukvak praong di abih, ba tal năng suất padai. Kayua yau nan ye di tukvak ini, urang Cam sangka tal bruk ieu yang. Urang sahaneng lac: suan padai jeng ye suan menuac. Pandap ieu yang lac sa drei pabe, 5 salao lasei, alak, baoh menuk, hala, paneing…Urang dang tabiak ngak adat lac ông Kadhar katung Rabap, dreih yau đàn nhị di urang Yuan.

-Ông Kadhar gam katung Rabap gam daa dom po yang saong daoh dom kadha daoh thánh ca, pok meyaom dom po yang, Po Inư Nưgar hu pato urang Cam pala padai saong daoh pok meyaom dom yang ia yau Po Glaong Girai, Po Rome hu ba ia mai ka menuac sia dalam palei pala drak. Tal tuk caga yuak, urang Cam gilac ngak adat cakak halau ia.

-Tukvak yuak kuak ngan saong urang ngak nong halei jeng lac tukvak bui sambai di abih, kayua pren yava di drei buh tabiak hu pabak veik. Urang Cam meda peih ngak adat “lisei padai bahrau”. Dom asar padai siam di abih, pahe di abih hu pilih ruah piah paling dom po yang, brei mboh bruk thau dhar phuan dom po yang hu daong ka anek menuac ngak padai hu padai ngak apuh hu siam.

-Taong abih dom adat cambat ini jeng kayua gru ieu yang ngak, po sang tok pang saong ngak njauk tacei pato. Bruk bayan pren ka gru ieu yang ye maong tame pandap ieu yang bo alin brei gru./.