Adat ngak nong di urang Nùng di Thái Nguyên

    -Harei li-ua halok hamu akaok mereip peih mbaok ka bilan pala drak, bhapbini ngak ndiuk bhong, jhuk, ralo menuk atau ralo ada caik tagok ban thờ, caong khin amuk kei saong dom po daong yuak kuak hu. Bhapbini sahaneng lac padai, tangei jeng hu suan yava, bhian taduan mek thái độ di anek menuac. Urang ngak siam saong padai, tangei ye padai, tangei tamuh cakrok siam; cagar veik, tangei padai nyu pandik harao, thu lagu tuk anek menuac hu thái độ, bruk ngak jhak.

-Bhapbini Nùng sangka tal bruk hajan gam saong adat uan sap tamnyak akoak bilan lac sap ieu suan padai, amaik padai, amaik taneh medheih tagok hadei di sa tukvak ndih dalam bilan la-ar, brak. Di tukvak nan, dalam dom sang, urang taha riak ia pha tea, tuh ia, truac glau daa amuk kei.

          -Ngan saong urang Nùng pak Thái Nguyên, bruk ngak adat cambat pambuak tal pala drak hu peih ngak gam gam dalam thun, yau ye dom rija roya: Lồng tồng “ocpo”, adat mbang lisei barau, harei pametai halak halin… Akaok xuân, bhapbini peih ngak rija roya lồng tồng di pasak ilimo palei. Pandap paling hu: ndiuk, menuk tuk saong dom phun hao ngak meng krem, kayau nyaom sambo màu hadah, hu padang atau tuan tagok dom dhar găng hu darui…Dahlau dhiah, tuk ngak adat salah blaoh, hu dom kadha mein bui sambai ye: Ném còn, tamia sư tử, daoh Sli, lượn…Harei ini, dom kadha mein nan hu salih tapa dom bruk daoh tamia, thể dục thể thao, rik daong kak kajap talei rohim pambuak bruk bhapbini, puk - palei.

-Tal harei 5 bingun bilan 5 yaok thun, bhapbini Nùng peih ngak adat pametai halak halin ka mblang hamu. Pandap ieu yang hu: ahan keo, alak, baoh kraoh…Adat ini hu peih ngak tui yaok sang meng caong khin bilan ngak siam, pala drak njauk, oh gaok halak halin palai kaik.

    -Sa adat praong pambuak tal bruk ngak nong lac adat mbang lisei barau. Dahlau di abih, urang yuak takik padai akaok bilan mai pambu thu, chai, xaok klik jeng brah, blaoh tahanek jeng lisei dẻo pahe bingi. Meyah padai oh ka tasak, urang kataik dom bingu buh tame gaok lisei brah klak piah hu pahe padai barau, maong nan lac lisei brah barau. Hadei di nan ba lisei barau gam saong salao pandap mbang hu: ralo, ikan, alak, saong sa caluk ia bai ngak meng baoh tasaoh, bei sọ, baoh kadaoh, baoh ploi, njam …caik tagok  ban thờ amuk kei…Po sang kakuh anak ban thờ, khan ka pren yava di amuk kei saong dom po yang hu pasang iek, sraong daong, caong dom po yang daok pasang iek, sraong daong ka bruk ngak di sang. Tamat adat, urang ba dom bingu padai hu hấp dalam gaok lisei klauk tame dom panyin gilau atau klauk tame tapen ban thờ. Hadei di nan ba lisei tabiak piah abih gauk gam taduan mek lộc. Salao lisei ini oh brei tuai mbang.

-Dom adat ka bruk ngak nong nan daok hu khik veik, mekre gah jalan ngak saong gheih gah asal kadha, brei mboh ilimo di bangsa, rik daong pakhang, pakajap bruk jum pataom puk palei saong khik ramik dom ilimo Nùng.

Thúy Linh