Adat ngak yang tapeng ia di urang ÊĐê: pakauk urang lạ hu mbaok

Yaok thun hadei di bilan yuak ( lac bilan 11, bilan 12 saka ia bilan), urang Êđê bhian ngak adat ieu yang bến ia piah caong ka hajan siam ngin lagaih, pala drak njauk, raidiuk trei sir haniem siam. Ini lac bruk taom gaok ilimo bhapnini hu makna siam dalam glo akaok di urang Êđê. H’ Zawut urang vak di rayo sap ndom Viet Nam daok di bhum Tây Nguyên hu kadha vak khan ka adat ini, daa mikva saong grauk yut tui pang:

Tapeng ia akaok halau chreih chrai dalam sap cồng chiêng yava tagok kadha “Iêu Yang” (Gọi thần). Dom  likei dam, kumei dara mek nding kreim raok ia la ar bingi tuh tame dom ché alak tapai piah daa Yang saong ông amuk ông kei mai menyum alak, pasang maong dom urang dalam buôn ngak adat ieu yang  bến ia. Taha palei Aê Zim, di palei Kniêt, xã Ea Ktur, huyện Cư Kuin, tỉnh Dak Lak, brei thau, yaok thun hadei bilan apuh, urang Êđê bhian peih ngak adat ieu yang bến ia: “Adat ieu yang bến ia hu peih ngak sa thun sa mbang. Tuk ieu yang bến ia brei hu sa drei pabui. Tuk sik ngak pabui jeng ba tabiak bến ia piah mbang saong gauk. Abih di nyu nan lac di pabah mbang palei jeng parang ralo tabiak. Gru ieu yang jeng ngak adat di pabah mbang palei.

Dahlau harei ngak adat, mikva buôn palei ba gauk puh ramik hacih saat bến ia, ngak pasiam jalan trun tagok, salih máng ia barau. Urang jeng hu caga dom pandap ieu yang harei hadei. Dom pandap oh kuhrang hu lac sa drei pabui saong dom ché alak tapai. Tui taha palei Aê Brin, buôn Kniêt, xã Ea Ktur, huyện Cư Kuin, abih menuac dalam buôn palei jeng hu mbaok, yaok urang sa bruk, nan ye bruk kuhria caga biak siam lagaih.

Tuk pandap ieu yang hu ba tabiak ginup di bến ia, gru ieu yang pok sap meroi. Akaok meti lac khan brei thau ka ông amuk ông kei thau ka bruk hu mbaok ginup anek taco dalam buôn palei, ba gauk ngak adat ieu yang bến ia. Patui nan gru ieu yang ngak adat ieu yang. Aduôn Hao, daok di xã Ea Tul, huyện Cư Mgar, tỉnh Dak Lak brei thau: gru ieu yang meroi da-a abih dom yang, yang ceik yang ia…caong daom yang daong ka halau ia siam jangaih, oh tuk halei thu, abih menuac dalam buôn tuk menyum ia ini jeng hu khang kajap pren yava, padai tangei bak kho, sang sang trei sir.

Meroi blaoh, gru ieu yang tangin par khiên, tangin par đao klauk tame ia,  makna lac pateok kanjah jhak nao piah halau ia tuk halei jeng hu siam.

Tamat adat ieu yang, dom sap chiêng atah hu taong tagok. Dom kumei dara cuk khan ao mengkan, ka-ing bak yot, mek baoh kadhoh thu saong nding kreim kandok dom tanyaoh ia li-an jangaih. Dom kumei dara likei dam tui takai gru ieu yang ba ia mai palei, tuh tame ché alak tapai ka bak. Mikva buôn palei ba gauk menyum alak bui sambai, taong cồng chiêng daoh tamia…tal abih harei.

Luac tukvak rah tabiak adat ieu yang di bến ia, di gah buôn palei, sap cồng chiêng jeng oh padheih yava tagok. Yau nan min, dalam harei ini, urang Ê-đê oh brei ngak dom bruk oh pambauk tal adat ieu yang. Urang ba gauk tame ngak adat, min oh caik ka uranaih nduac srau kadau, huac ngak nerak ia, ngak gaok tal dom po yang. Dom urang nan jeng pakauk tuai lạ tame buôn. Taha palei Aê Áp, daok pak xã Ea Tul, huyện Cư Mgar, tỉnh Dak Lak brei thau: dua gah bambang sang di po bến ia tuan talei mrai hồng, tung menuk saong vòng ngak meng kreim. Jalan tame buôn hu phun pacang gar, kak dom janih talei tuan ye mrai hồng, bilau menuk, baok kadhaoh thu…piah brei ka tuai atah thau harei ini dalam buôn hu bruk, pakauk urang lạ tame buôn. 

Adat ieu yang bến ia hu tamat meng adat peih bambang buôn palei. Gru ieu yang, taha palei saong po bến ia (lac urang khik iek bến ia) ba gauk tabiak peih bambang buôn. Di sang po bến ia, urang kak sa ché alak sit, sa drei menuk saong puac panuac meroi tamat adat, mikva buôn palei hu nao ravang apuh saong ngak dom bruk yaok harei.

Adat ieu yang bến ia caong ka hajan siam angin lagaih, raidiuk siam mekre, likau ka bhapnini  hu halau ia jangaih siam,…brei mboh adat cambat gheih mekre di urang Êđê. Adat ieu yang ini urak ini jeng hu dom buôn palei di tỉnh Dak Lak peih ngak, tok hu sa janih karei lac oh hu paga pacang bambang buôn yau dahlau, brei tuai quý atah jaik hu mbaok tame lễ hội./.

                                                                                       Thúy Linh