-Dalam baoh sang atah di ông Y Thim Byă, daok di buôn Ea Bông, xã Cư Êbur, ban sit Buôn Ma Thuột, tỉnh Đắk Lắk, tanyi tagok sap chiêng ieu daa tuai damuai di dom buôn atah jaik mai gam bui sambai saong po sang dalam adat “ieu yang pahadar kaong ban”. Sap chiêng, sap gar tanyi tagok chreih chrai jeng lac tuk drei pabui paling yang hu ngak rilaow, dom ché alak tapai hu kateik hala saong tuh bak ia, abih janih hu caga bloh ka adat paling yang.

Ông Y Thim Byă brei thau, thun ini hu ông amuk ong kei saong dom po yang daong yau nan ye sang ông hu rilo pren yava saong patoah jamo. Tui panuac sanya ye sang ngak adat thau dhar phuan ngan saong sa drei kubao tano saong 7 ché alak tapai. Min kayua oh ka pilih ruah hu tukvak siam lagaih yau nan ye sang ngak adat hadar, pagun tal bilan 3 thun hadei. Pandap paling yang harei ini lac sa drei pabui tano saong 3 ché alak tapai:“Thun ini sang Y Thim hu pren yava, haniem siam, blei hu kik kpan, yau chiêng klak mengkan, ché tuk, ché tang. Harei ini ngak sa drei pabui paih pathau khan saong buôn palei, ông amuk ông kei. Khan brei thau dom hagait drei ngak hu piah abih gauk thau saong piah ka dom po yang daong drei. Harei ini hu dom ché alak tapai saong drei pabui yaom lac oh rilo min meng haniem phuan nan lac bruk jum pataom bhapbini.

Dalam rai anek menuac di urang Ê Đê hu rilo adat paling yang, taong abih dom adat ini hu pambuak kajap tal baoh kaong bal. Yaok adat hu ngak sa dấu khắc angaok baoh kaong. Ta-eng adatpaling hadar kaong ban oh hu bruk khắc vòng. Gru paling yang tok meroi hadar pagun saong likau pagun ka po sang di sa tukvak karei siam lagaih jang piah ngak tui panuac sanya dahlau nan.

Pandap paling yang hu parang tabiak ginup abih dom bộ phận di drei pabui hu: akaok, iku, bong bóng, darah, hatai hajai. Adat harei ini di sang Y Thim, kayua aê Lê – gru ieu yang di buôn Ea Bông ngak. Ông pan baoh kaong ban cuk tagok takoi tangin di po sang saong puac panuac likau. Asal kadha di panuac likau lac daa ông muk ông kei mai maong adat, hadar veik panuac hu sanya saong pagun veik. Brei mboh hatai thau dhar phuan di pô sang tal ông muk ông kei saong dom po yang, caong ông muk ông kei saong dom po yang daong ka po sang hu pren yava khang kadang, gaok rilo patoah jamo: Urak ini dahlak ieu taong abih gauk da-a dom po yang , ong muk ong kei mai maong iek. Ini lac ché alak tapai caik gah angaok, baoh kaong ban caik gah ala, lac baoh kaong ban hu đúc tabiak, hu ngak tabiak, oh lac baoh kaong duan hu. Caong dom po yang maong iek, khik caga ka po sang hu khang kajap, yau baoh kaong ban khang oh limin lamuac. Ini tangin po sang hu cuk kaong saong pan cần alak, abih hatai pok tagok.

-Salah panuac ieu yang, diuk pasang po sang gam saong gru ieu yang mbang iek dom pandap piah caong ka abih janih hu patoah jamo. Dom urang hu mbaok patui gauk pok cần alak, urang kumei dahlau, urang likei hadei, urang taha dahlau, urang ranaih hadei. Dalam chreih chrai panuac tadhau yuh gauk, gam bui sambai di po sang saong tuai damuai, sap chiêng sap gar tanyi tagok ngak jeng harei bui sambai. Nan lac phần hội hu peih tabiak.

Hu mbaok dalam adat paling yang di sang ông Y Thim harei ini, lingiu gauk gar dua gah saong mikva dalam buôn daok hu tuai da a mai meng dom buôn, huyện karei. Ông Y Hơ Êban, nghệ nhân buôn Knia 4, xã Ea Bar, huyện Buôn Đôn hadah mbaok hu daa gam saong kapul nghệ nhân di buôn Knia mai taong chiêng dalam adat. Ông Y Hơ khan lac, meng livik paje urang Ê đê di dom buôn meng hu harei taom gaok gauk, tanyi ravang gauk saong ba gauk paoh chiêng chreih chrai yau ini: Tuk hu Y Thim daa kapul nghệ nhân ye dahlak ba adei saai mai hu mbaok ginup abih. Dahlak mboh biak bui sambai kayua hu maong veik, hadar veik adat cambat tanarakun gam tadhau yuh ka sang nan ye dahlak mboh biak bui sambai. Livik paje kol dahlak oh hu mbaok tame adat yau ini.

Oh lac urang praong thun bo dom urang ranaih umo dalam sang ông Y Thim jeng biak sangka tal dom adat hu peih ngak di sang drei. Y Nal Êban, anek likei ông Y Thim khan lac, meng sit saai hu mboh rilo adat, adat paling yang kayua ông amuk, amaik ame drei ngak. Meyah dahlau diah tok lac bruk tò mò ye urak ini saai kham merat duah thau dom adat ini meng bruk takre saong hatai sahneng khik yaom ilimo di urang ngak adat: Hu maong yau ini meda daong ka drei harei hadei meda ngak hu dom bruk yau ini hu mbuan lagaih saong drei meda ngak tui trình tự dom urang mengkan caik veik. Dua tra lac drei menuac ngak dalam gah ilimo yau nan ye tuk halei jeng pahadar rup drei oh caik lihik ilimo di bangsa drei.

Dalam labik chreih chrai sap chiêng, tapeng ging apui khuah meng tuk adat peih tabiak mbiah tal tuk hội salah bloh. Meng po sang tal tuai damuai ba gauk menyum alak tapai bui sambai, tanyi ravang gauk. Ngan saong urang Ede, dom adat paling yang oh lac tuk piah thau dhar phuan ong muk ong kei saong dom po yang bo daok lac tuk piah ka dom adei saai gauk gar di dom buôn pataom gauk, gaok gauk, ngak jeng bruk jum pataom khang kajap dalam bhapbini./.