Pathau mikva saong grauk ayut, birau ini, di baha Cốc saong kraong Cửa Đình, di phường Phong Cốc, ban sit Quảng Yên, tỉnh Quảng Ninh peih ngak adat  trun hamu 2017. Ini lac bruk ngak ilamu, the thao saong du lich biak gheih karei di ban sit, bruk ni pachreih hu rilo bhap bini saong tuai damuai tame.

Adat  trun hamu thun in hu angan ieu lac “ Mai bhum taneh inem krung ilamu Quảng Yên”, ini lac adat mai meng bruk “li-ua hamu” saong adat “ hadei yuak padai” di mikva bhum taneh Hà Nam. Adat ini hu meng lavik mai, min kayua rilo makna bo oh daok mboh dalam raidiuk mikva labik ini meng dom pluh thun tapa, min harei ini, sap brong, sap hagar taong  tagok, ye dom siam mekre di adat cambat nanhu veik mai dalam baoh hatai di mikva.

Amuk Tô Thị Thu, Bí thư Đảng ủy phường Phong Cốc, labik peih bruk trun hamu brei thau: “Adat  hu padang ngak  veik meng thun 2007, hadei di nan hu peih ngak thun 2009 saong thun 2013, uan bruk peih pakak inem krung nan ye adat thun ni hu peih ngak veik. Ini lac adat meng kan di urang palei ini. Adat  nan hu makna ngan saong mikva daok di pulao kaoh bhian pambak tame langik tasik, bilan ngak padai ye oh hu ia daok bilan pala nyam patam ye ia dauk metai. Adat hu padang tabiak meng bruk nan.”

Adat ngak yang hamu yang padai saong yang sang caong khin dom po yang chraong daong ka bhap bini ngak hamu hu padai, trei sir, sang danaok haniem siam.

Pang dom urang taha khan veik, rija trun hamu bhian peih ngak di akok bilan 6 saka ia bilan, nan lac tuk tam padai. Adat nan hu peih ngak dalam 2 harei. Harei tame ngak adat yang hamu dah mesup page, hadei adat ngak yang padai saong yang di sang, urang mbuan yang trun hamu anak kalan tam padai anak bruk hu mbaok di mikva dalam palei. Kreh hamu hu padang phun neu, gah angok hu tuan dhar phun phan patrauk but bhong, hu thaot binguk padai brah, tangei, rabai ratak, manuk, pabui…brei mboh hatai caong ka bilan pala njauk, hu rilo padai brah. Hadei meng adat ii bloh,  mikva dalam palei meng hu tam padai trun hamu sang drei.

Langiu di nan, daok hu peih bruk pakacah caluai ia di kraong Cửa Đình, daoh tamia chèo di mblang kalan, daoh nao tasik, puac jan, dom kadha karei karei…jeng hu peih ngak bui sambai ka mikva jeng yau tuai damuai.

Ong Pham Van Thanh, urang daok di phường Phong Cốc lac: Khol dahlak  khik veik adat di palei, di muk kei caik veik 582 thun ini mai. Dahlak patui veik bruk ini meng umo 17 thun, thun ini dahlak 56 thun, yaom lac khol dahlak thuvi thuvar rilo bruk min khol dahlak brei khik ngak adat di baha palei. Piah pachreih tuai damuai atah jaik, anek kamuan nao ngak mbang atah palei hadar  veik puk paga palei negra drei.”

Hu mbaok tame harei ngak yang trun hamu di urang Quảng Yên, meng mboh abih hatung hatai di mikva labik ini. Urang pachreih abih hatai, taong hagar biak bui sambai, rilo menuac pan hala dok trun ia raok ghe pakacah. Urang pakacah vah ghe mboh urang pachreih ye kham vah samar tal labik.

Dua harei peih ngak adat tapa nao, mikva Quang Yên veik mai saong bruk hit yaok harei di drei. Coang khin, dom adat cambat meng kan yau adat trun hamu  brei khik ramik yau sa drap ar takik hu piah ngak brei kaya meda jang ka sajarah dak rai, ilamu di bhum taneh anh hùng ini./.