Bhian di nyu, adat uan umo thun japkaro suan atah hu ngak tuk umo ginup 70 thun, 80 thun, 90 thun saong bak 100 thun lac uan tabuan praong.

Dalam hatai saheng di urang Viet, yaok menuac menek tabiak thei jeng caong khin hu 5 kadha siam mekre, patuah jamo dalam raidiuk, nan lac: Phúc, Lộc, Thọ, Khang, Ninh, dalam nan Phúc lac bruk siam mekre, Lộc lac kaya meda, Thọ lac japkaro suan atah, Khang lac prein yawa khang kajap, Ninh lac salamat. Dalam dom kadha nan, Thọ lac bruk kan thau di abih nan ye thei jeng caong khin di abih.

  Baoh sang hu urang umo thun praong iek nan lac bruk siam mekre praong, anek taco hu uan thun umo jap karo suan atah di ong  muk, amaik ame lac bruk sambai, hadah mbaok meta. Kayua yau nan ye, uan umo thun taha lac sa ilamu biak njauk iek praong.

Bhian di nyu, dom bruk dalam adat uan thun umo jap karo suan atah tui  adat cambat di yaok bhum palei bo hu jalan ngak karei di gauk. Min bruk uan thun umo jap karo suan atah hu peih ngak di sang. Dalam harei uan umo thun karo, anek taco brei tadhau ayuh meng alak, ndem meyai dom panuac siam mekre piah brei mboh hatai thau dhar phol, caong khin amaik ame, ong muk jap karo suan atah diuk rai suai lavik haong anek taco, alin hadiah dom pandap sit yau khan ao, tanyiak…atau cuak ariya, panuac pandao, cih huroh, alin blah thaot binguk…piah ong, muk taha bui sambai. Uan thun umo jap karo suan atah nan jeng lac bruk pato pakai anek taco diukrai siam mekre, thau anak thau likuh ngan saong manuac sia di dunya.

Tapa bruk uan thun umo jap karo suan atah, urang taha mboh haniem phol  jang kayua mboh anek taco thau akaok thau iku, urang mboh prein yawa dom thun bilan raong pato anek, daong ka menuac sia hu bayar veik. Anek taco jeng mboh hadah mbaok meta ka ong muk, amaiik ame, jeng yau jalan diukrai di baoh sang drei, bui sambai kayua hu brei ka drei bayar dhar phol, ngak brei ong muk, amaik ame sambai hatai.

Dom thun jaik ini, bruk uan thun umo jap karo suan atah oh daok lac bruk dalam  baoh sang bo daok hu Kapol urang taha umo, urang lambaok karja palei mai tadhau ayuh prein yawa khang kajap umo thun atah. Rilo labik urak ini peih bruk uan thun umo jap karo suan atah ka dom ong, muk taha di baha palei atau di sang ilamu palei, brei mboh bruk sangka di bhap bini ngan saong urang taha./.

Urang lang: Ai Nghiem - 28/9/2021