Khol hulin nao tal palei Kon Jơ Ri, xã Đăk Rơ Wa, ban sit Kon Tum (t.Kon Tum). Ni lac palei di urang Ba Na meng Đăk Blà mai tal bhum palei Đăk Rơ Wa padang mbang ngui. Urak ni, palei hu  172 sang, rilo meng lac urang Ba Na. Jaik abih dom urang kamei dalam palei jeng thau ngak alak  ghè piah menyum dsalam sang song dom harei rija prong di palei. Tui tacei pato, khol hulin nao tal sang  amuk Y Maih, sa dalam dom urang ngak alak  ghè bingi abih dalam palei Kon Jơ Ri. Tui muk  Y Maih, bruk praong dalam ngak alak lac brei hacih. Alak hu tanek meng rilo janih asar karei di gauk yau  gào, brah, asar bo bo, asar tangei, bei plom… Abih di nyu lac, tapa ngak alak ghè hu ngak meng kanduh phun glai.

Amuk Y Maih brei thau: “Dahlau deih, tuk dok hamu daok puh, khol hulin bhian tagok puh mek kanduh phun Hiam mai ngak tape. Alak hu ngak meng rilo janih, min bingi di abih  lac tanek meng gào atau nduik jhuk. Lak ngak meng dom  janih ni meda mepiah hu luac thun. Langiu di nan, alak bingi halei oh jeng mai meng plak tangin gheih di urang kamei”.

Ong Bik doK di palei Chuet 2, phường Thắng Lợi, ban sit  Pleiku (T.Gia Lai) hu tong yaom lac urang ngak alak  ghè bingi abih dalam palei. Menuac sia jia hatai blei mai menyum  kayua ong dok ngak alak meng janih tape saman dahlau. Ong Bik brei thau: Alak ghè biak hu yaom glaong dalam rai duik di urang Jrai, oh kurang hu dalam dom harei ieu Yàng, adat thau dar phol amaik ame atau dom harei pataom mbaok, ginum biai di palei. Alak ghè lac talei pambuak anek menuac haong po yang, anek menuac haong anek menuac, brei mboh bruk jum pataom di puk palei. “Alak ngak ka urang oh thau biai jeng menuac thau biai . Alak dui takai urang mai. Alak daong lang talaik bruk kandah gauk, dong ka menuac urang thau anit ranam gauk , jum pataom gauk song dong ba gauk”, ong Bik bui sambai lac yau nan.

Dalam adat thau dar phol, urang anek pok kakuh dar phol amaik ame, caraok ka amaik mbang, saong daa amaik ame menyum alak. Alak  ghè tuk ni  brei mboh hatai ranam prong glong, thau dar phol di anek taco brei ka amaik ame tuk umo taha  .

Langiu di nan, dalam dom harei rija prong di palei, yau adat kakuh ia, adat cúng lễ Pơ Thi, adat likau Yàng brei abih ruak, ye alak  ghè hu Gru ieu yang ngak adat, ngak ka nyu jeng janih alak ginreih piah pok tagok po yang .

Oh lac palei  Kon Rơ Ri, palei  Chuet 2, bo dok hu biak rilo palei bhap bini bangsa takik karei karei di dom  tỉnh Tây jeng dok khik hu ilamu alak  ghè dalam boh sang tual piah khik ramik hu bruk gheih mekre di bangsa. /.

Urang lang: Hanipha- 23/11