-Nao tal palei Cam ấp 4, xã Xuân Hưng, huyện Xuân Lộc, tỉnh Đồng Nai dalam dom harei ini, mboh bhapbini Cam daok chreih chrai caga tame bilan eik Ramadan. Ini lac bilan bo taong abih urang umo meng 15 thun tagok njauk ein mbang, ein menyum, ein njuk pakao, ein taong abih dom hagait ba tame rup pabhap meng tuk ia harei tagok tal tuk ia harei tame meng hu mbang menyum veik. Ini jeng lac bilan siam piah ngak pahala, daong ka menuac sia, daong ka urang kan kathaot. Dalam bilan eik Ramadan, oh mein sambai, oh daoh tamia.

-Dahlau dhiah, Ấp 4 lac ấp kan kandah di abih dalam xã Xuân Hưng, min meng salih jalan sahanneg, jalan ngak saong hu mbang tui ralo sarak daong di karja nan ye raidiuk mbang ngui daok dang di bhapbini Cam dak harei dak tagok. Ndom biai ka dom salih barau di palei Cam drei, ông Mohamad Amin, Hakim sang megik Nourul Ehsan brei thau, urak ini jalan palei hu tuh bê-tông samu tapak, dom baoh sang barau hu padang tagok khang kajap salih ka sang tual ngak meng kayau. Dalam ấp hu 439 sang gam saong labaih 2.200 menuac. Dom menuac dalam ấp tal umo thun ngak bruk jeng hu bruk ngak tani tanat di dom công ty daok dalam xã. Hu jien mek tame, raidiuk dak harei dak tani tanat yau nan ye bilan Ramandan thun ini, mikva kuhria caga siam jang duk saong dom thun dahlau.

Jeng yau mikva Cam di ấp 4, tỉnh Đồng Nai, piah caga tame bilan eik Ramadan, labaih 7.000 urang Cam Islam daok di 21 jamaah di ban raya Hồ Chí Minh jeng hu blei dom pandap nda, ahar meneing piah mbang eik. Gam saong bruk kuhria caga di mikva, Ủy ban Mặt trận negar Việt Nam ban raya Hồ Chí Minh hu padang kapul nao ravang, tadhau yuh saong alin pandap ka mban lambaok bhapbini Islam ban raya HCM saong mban quản trị dom sang megik, dom sang bhapbini kathaot di ban raya.

Viet Nam urak ini hu labaih 80 rabau urang Islam, dalam nan urang Cam meblah labaih 85%, hu abih tih jaik 100 Masjid, Surao, ralo meng lac di dom tỉnh gah meraong.

-Yau nan lac sa bilan eik Ramadan daok mai veik haong mikva urang Cam Islam. Tui jalan ngak lac: “ siam ka dunya, mekre ka agama”, urang Cam Islam oh padheih pakacah gauk ngak rilo bruk siam, rik daong patagok bruk jum pataom bangsa, dak padang puk paga, palei negar dak harei dak siam mekre, ginup meda./.