Dalam dom harei akaok thun bahrau, khaol dahlak nao tui jalan palei duah tal labik ngak  "tung lò mò"Anas daok di ấp  Phũm Soài, xã Châu Phong, bal sit Tân Châu, tỉnh An Giang. Tung lò mò nan lac sa pandap mbang bingi di urang Cam hu ngak meng rilo pha saong limek limo. Bruk ngak di labik ngak tung lo mo Anas tuk halei jeng chreih chrai. Adei sa-ai kumei Cam urang rao rilo, urang srau rilo haong limek limo gam haong dom gia vị yau: amariak kalu, saradang, sara, bọt ngọt…traok tame pruac limo, ba nao pambu thu, bloh đóng gói saong hút chân nan lac salah bloh. 

          Bruk ngak "tung lò mò" hu dom adei sa-ai kumei ngak biak samar, biak gheih. Dom harei tapa, urang di dom tỉnh ban jaik taphia đặt blei biak rilo piah ngak pandap alin dalam dom harei tết. Kayua yau nan ye, labik ngak tung lo mo Anas jeng daok kham merat ngak piah samu hu pandap jao brei ka urang blei. Jien mek tame kuhria rah tapa di adei sa-ai kumei Cam ngak bruk pak ini meng 4 tal 5 triệu đồng sa bilan. 

          Oh lac urang Cam takre mbang, bo urang Yuen, urang Khmer pak ini thei jeng takre tung lo mo ini. Dalam dom harei nao ma-in tết, tuai damuai hu mai tal palei Cam Châu Phong thei jeng takre mbang janih pandap mbang meng kan ini. Piah ngak jeng sa janih pandap hu angan je yau urak ini, labaih 6 thun tapa labik ngak tung lo mo Anas hu buh tabiak labaih 300 triệu đồng piah blei mac moc gam haong bruk rik daong di karja palei saong bhap bani pak ini.

          Palei Cam Châu Phong dalam dom harei ini biak chreih chrai kayua labik ngak tung lo mo Anas tabiak panuac caong pah rilo menuac tame ngak. Ndom binyai haong sa-ai Salếch, po labik ngak “tung lo mò” Anas, sa-ai brei thau sa kadha bui sambai nan lac dalam thun ini, tung lo mo di sa-ai meda hu mbaok di siêu thị VinCom. Puac thun bloh, tung lo mo di sa-ai hu taong yaom glaong di Nyaom darak pablei salih di Malaysia. Ini lac kadha bui sambai ka janih pandap "tung lò mò" dalam dom harei akaok thun bahrau ini.  

       Tết ini, taphia dom pok tea, har mứt, sang urang Cam halei di An Giang jeng hu dom kilogam tung lò mò Anas piah mbang dalam dom harei tết. An Giang urak ini hu 880 palei ngak meng kan biak hu angan saong bruk menyim jih dahlah, tranh pet meng tangin, saradang thốt nốt saong dom janih ikan thu, mesin... dalam nan hu palei ngak "Tung lò mò". Bruk cakrok patagok di bruk ngak ini dalam dom thun jaik di ini hu daong ba bruk ngak ka mikva dalam palei saong daok pabak rilo jang ilamo mbang menyum di palei Cam An Giang. Harei Tết, vaih tame bhum taneh ini, tuai damuai meda mboh takre, mboh chreih chrai meyah hu mbang "Tung lò mò" biak bingi dalam ragu ragam daoh bhap bani Cam./.