Meng harei 25 tal harei 29 bilan 4 thun 2018, lac harei 10 bingun bian 3 tal harei 14 bilan 3 thun 2018 tui saka ia bulan, Harei pataom Ahar bhap bini gah Meraong thun 2018 ngan saong kadha “Halau gha baoh ahar bhum palei” hu rah tabiak di ban Can Thơ.

Ini lac harei pataom praong hu peih ngak yaok thun di harei 10 bingun bilan 3 saka ia bulan pak Can Thơ. Bruk ini hu rik tame bruk khik ramik saong patagok ilamu pandap mbang gah Meraong; peih tabiak jalan ka dom urang ngak ahar, dom doanh nghiệp patagok bruk padang angan saong yaih khan dom pandap mbang bhap bini gah meraong, peih tabiak labik ka bhap bini saong tuai damuai mai rivang iek, blei mbang,  me-in sambai.

Harei pataom ahar hu mbaok di labaih 200 gian hàng ngan saong  labaih 100 janih ahar, ndiuk, bu yamen, lac kaya mbang bingi di rilo bhum palei dalam taneh ia. Langiu di nan, daok hu gian hàng di dom negar Nhật Bản, Campuchia, Malaysia...

Mbiah tal ini, tuai damuai hu mbang dom janih ahar pahe bingi yau ye: Ahar tằm bei plom  bhian randap di urang daok di miền Tây. Ahar njal,langeim di bei plom saong la-u kuah, gam saong pahe langeim di ia tanh la-u, pahe di lange ngak jeng sa janih pandap mbang kan var hu.

Ahar patei kahon ia tanh li-u lac pandap mbuan ngak, abih di nyu nan lac candiah patei ahar hu papaok meng sa tal tapung bột năng njal bingi, mbang saong ia tanh li-u biak bingi.

Ahar hala mơ hu ngak meng tapung brah, hala mơ saong ia tanh li-u. Ahar hala mơ nyu yamen, njal di tapung brah, tut saong ia tanh li-u.

Bánh hỏi lac pandap mbuan mbang mboh ralo di dom tỉnh gah Meraong saong bhum kreh negar. Ahar hu ngak meng brah rao hacih, tram tapa melam, blaoh kahon tathak. Ahar hu mbang salih ka lisei hu payak dam ndam likhah, paling da-a muk kei…

 Ahar bánh khọt daok ieu lac ahar baoh manuk, nan lac ahar biak randap di urang gah Meraong. Ahar hu sambo kanjik katam, jangaih, vin taom dar hu sambo katam racam, kreh hu sambo haijao di hala lasun, sambo bhong meraih di hadang, ratak naih, mboh mekre meta.

Ahar troi nươc danei angan di bhum gah Meraong. Ini lac janih ahar gol vin ngak meng tapung ndiuk, njal gah dalam hu hatai ratak naih, mbang saong ia li-u tan biak langeim bingi.

Ahar cúng lac pandap mbang bhap bini saong ahar bánh cấp di bhap bini gah Meraong, abih di nyu lac  bhap bini miền Tây. Ahar hu ngak meng tapung brah, lai saong ia tanh li-u, sara dang, ia hala dứa. Ahar njal, langeim, yamen bingi.  

Ndem tal pandap mbang Tây Nam bộ, njauk ndom tal bruk lac nyu mbuan ngak, bhian randap. Bhian randap meng pandap ngak tal angan ieu di ahar. Ahar hu thaot binguk dreih yau anek tằm ye iew lac ahar tằm, ahar  ngak meng patei eiw lac ahar patei. Daok ahar hu dom tal lipih yau kalik pabui eiw lac ahar kalik pabui.

Ahar bilik yamen, daok lac bánh ướt meda maong lac pandap mbang di Ben Tre. Ahar ini biak di nyu lac ahar tapei li-u tuk birau tuh tabiak, oh ka ba tabiak pandiak cambu, nyu daok tathah, bilik tame hasit ratak naih, li-u kuah, mbang biak bingi.

Tapei nung hala cẩm Cần Thơ lac sa dalam 100 janih pandap mbang dang akaok, panmdap mbang bingi di Viet Nam saong lac sa dalam dom janih pandap mbang bhap bini hu Martin Yan palih ruak quay phim ba tame danka dak "Taste of Vietnam".

Di miền Tây, ahar hala la-u hu mboh di rilo tỉnh meng Long An, Tiền Giang, tal Trà Vinh, Sóc Trăng, min Bến Tre meng lac pasak di baoh ahar hu kanduh ngak meng hala la-u. Ahar njal, langeim, pahe ndiuk saong ia tanh li-u.

Raidiuk dak harei dak salih bahrau ngak ka urang mbuan varnao  ilamu mang kan, ye harei pataom ahar bhap bini lac tuk piah ka urang taha hu mai veik haong dom siam mekre meng kan, hu diuk veik haong dom thun bilan daok sit di drei, saong tapa nan dom rai ranaih hu jalan duah thau ka ilamu meng kan di bangsa./.