Bánh Bò Thốt Nốt đi ửng bhapbiniKhmer Bảy Núi, An Giang

    -Bánh bò thốt nốt lac pandap ngak meng saradang thốt nốt, lac sa pandap mbang takre di mikva miền Tây kraong ia, abih di nyu nan lac mikva urang Khmer bhum Bảy Núi, An Giang. Kadha vak di Kim Cương, urang pambuak bruk di rayo sap ndom VN daok di ban raya HCM 

   -Mengkan mai phun thốt nốt nyu kak kajap saong raidiuk di urang Khmer Nam Bộ. Phun thốt nốt lac but paneng, phun tapak, glaong jaik 30m, diuk hu jaik 100 thun, dhar praong jaik 3m. Camereip, phun thốt nốt hu mikva pala rilo di bhum Bảy Núi, An Giang, hadei ini hu mboh di Đồng Tháp, Tây Ninh. Hala thốt nốt thu meda tak sang, pak canaih, pak ndon pacang pandiak hajan; phun thốt nốt tapak, khang kajap dreih yau phun la-u meda ngak geng sang, gheng tatua; yaok phun thốt nốt binai hu meng 50 tal 60 baoh. 

  Bingu thốt nốt yaok harei 2 mbang hu urang mek ia ngak saradang thốt nốt. Baoh thốt nốt taha hu kanduh sambo màu tím than, gah dalam hu 3 múi, sambo patih mbon, mbang mboh yamen, pahe, la-an dreih yau baoh la-u ia. Daok tuk tasak, baoh thốt nốt hu  kanduh tím kanyik saong druh eng trun haluk. Meng sahneng duah di bhapbini palei, baoh thốt nốt tasak hu pandar piah ngak men ka bánh bò thốt nốt, janih har hu angan di bhum Bảy Núi, An Giang.

-Bánh bò thốt nốt hu ngak meng tapung brah, saradang thốt nốt, tapung baoh thốt nốt tasak saong ia tanh la-u. Piah ngak hu ahar bingi bingi, dai, xốp,  bhapbini Bảy Núi pilih ruah brah bingi, tram dalam 5 tuk, piah ka brah nyu lamin, hadei nan ba nao xay nhuyễn meng lasung xay tangin, ngak jeng ia tapung mịn. Ia tapung ini hu tuh tame sa kadung khan bai, brei ka nyu tabiak abih ia meng kateik tagok sa baoh patau praong. Tagok men tapung oh kurang hu baoh thốt nốt tasak, baoh thốt nốt tasak laok kanduh, hu sambo màu kanyik blaoh ba nao sah, mek ia tapung. 

 Mikva srau tapung brah, tapung thốt nốt, saradang thốt nốt saong ia tanh la-u ba nao pambu pandiak dalam dua tal klau tuk ka tapung raak tagok. Hadei di nan, buh tapung ahan tame khuôn. Meyah bánh bò di rilo bhum karei hu ngak dalam khuôn meng nhôm atau inox ye bánh bò thốt nốt Bảy Núi hu caik tame dalam khuôn meng hala patei atau hala sò đo. Ahan hu dak tame baoh canaih krem, ba nao hấp dalam ia pandiak jaik meteh tuk lac mbang hu. Ia hấp nan njauk jru, meyah oh jru ahan nyu chai, khang, oh xốp. Bánh bò thốt nốt bingi tuk tasak meda hu độ dai, xốp hasit, hu sambo màu kanyik di tapung baoh thốt nốt, yamen la-an di saradang thốt nốt gam saong langeim di ia tanh la-u, pahe bingi. 

 -Mengkan, bánh bò thốt nốt di bhapbini Khmer bhum Bảy Núi, An Giang hu ngak tuk lễ, tết mengkan yau Chol Chnam Thmay, Dolta,  Ok Om Bok piah paling yang, amuk kei dom kaya mbang palei negar piah thau dhar phuan lingik tasik brei hajan siam angin lagaih, ngak padai hu padai pala tangei hu tangei. Harei ini bánh bò thốt nốt hu ngak luac thun, ye sa pandap mbang bình dị, dân dã ka dom urang tuai mai tal bhum Bảy Núi, An Giang. Bánh bò thốt nốt oh cao sang yau rilo janih ahan karei, min hu daong ka mikva libik ini duah hu jien diurai yaok harei, rik daong raong anek nao bac di anek taco bhapnini Khmer./. 

Thúy Linh/VOVTPHCM