Dahlau di harei mbang muk kei, ông Não Văn Sáu, daok di palei Râm -Văn Lâm, xã Phước Nam, huyện Thuận Nam,  tỉnh Ninh Thuận biak bui sambai tuk mbang akaok mereip sang ông lac sa dalam 300 sang dalam palei hu mbaok tame ngak “ mblang hamu praong”. Meng vụ akaok mereip pandar mo hinh “ 1 njauk, 5 trun’ tame pala drak, “mblang hamu praong” di xã Phước Nam yuak hu meng 7 tal 8 tấn/sa ha. Tui nan, sang ông Sáu hu jien mek tame tani tanat dalam bilan tua riya saong hu jien paling muk kei dalam harei mbang muk kei hu siam jang.

-Dom harei mbang muk kei, dom palei Cam dalam xã Phước Nam jeng hu peih melam doah tamia. Saai Kiều Thị Khám, urang dalam kapul daoh tamia Phước Nam brei thau: piah peih ngak hu sa melam daoh tamia di dom palei dalam xã, dahlau di harei mbang muk kei, adei sai kumei dalam palei harei melam pasram piah duh siam ka mikva bui sambai harei mbang muk kei. Danakadak di kapul daoh tamia lac dom kadha daoh bhapbini saong dom ragam tamia mengkan di urang Cam.

 -Yau yaok rabau sang karei, sang saai Đào Thị Đậy daok di palei Cam Lương Tri, xã Nhơn Sơn, huyện Ninh Sơn, tỉnh Ninh Thuận kuhria caga siam dom pandap ye: lư trầm hương, khay hala paneing hadah jangaih, baoh kraoh, khan ao barau …raok adat mengkan. Saai Đẩy khan lac, rilo thun tapa, bhum taneh ini bhian gaok tua riya, meng bruk daong di karja saong bruk salih jalan saneng, salih jalan ngak, sang saai hu tabiak truh kathaot. Saai Đẩy bui sambai lac, kinh te sang ginup meda tagok nan ye hu jien mbang muk kei trei sir jang dom thun dahlau:

-Mbang muk kei peih akaok meng adat nao gun. Ngan saong urang Cam Awar dalam harei ini, yaom lac nao ngak mbang pak halei, jeng rami ramik tukvak mai piah nao gun mukkei. Thun ini, harei nao gun daok pachreih hu rilo tuai damuai saong sinh vien dom sang bac Đại học mai pataom mbaok, roh duah, duah thau ilimo Cam. PGS.TS Thành Phần, Giám đốc pasak roh duah Việt Nam – Đông Nam Á brei thau: “ Yaom lac urang Cam ngak mbang atah jeng njauk mai sang saong nao gun daa muk kei pok kakuh dreih yau harei giỗ tổ muk kei. Yau nan ye harei ini yau harei roya. Urang jeng blei ao khan bahrau, daa muk kei mai sang mbang giỗ”

-Tamat harei nao gun, mikva mai sang piah paling muk kei, caong sa thun barau siam mekre, ginup meda. Thun ini, yaom lac gaok kan kandah di pandiak bhang, min meng bruk sangka di karja puk palei, bhapbini Cam Ninh Thuan hu kuhria caga ka harei mbang muk kei biak siam mekre. Dom halau janeng nao dahlau dalam bruk dui pataom agama, jak ba tín đồ jum pataom, daong gauk ngak mbang.

-Nao tal dom palei Cam di tỉnh Ninh Thuan dalam dom harei ini, mboh bruk chreih chrai uan raok harei mbang muk kei hu mai tal grauk puk palei, tal yaok baoh sang. Urang bhapbini brei thau hatai bui sambai hu Đảng, karja sangka, ba mbuan lagaih piah patagok kinh te. Thun ini, bhapbini Cam bhum tua Ninh Thuan uan raok harei mbang muk kei dalam jum pataom, bui sambai, patak pataom./.