Sang tol di urang Raglai 

Tui adat cambat meng kan mai, bruk padang ngak sang bahrau di urang Raglai hu peih tabiak meng adat glang duah taneh. Amuk po sang ba 7 asal brah caik tagok taneh blaoh mek panjin gum tagok piah glang duah bruk daong ba di yang taneh. Hadei di 3 harei, 3 melam veih panjin tagok mong, meyah asal brah daok tamo ye lac siam laghaih. Cagar veik, lahik asal halei ye njauk nao glang, duah labik karei piah padang ngak sang. Sang tol meng kan mai di urang Raglai hu dak tame janih kiến trúc bhap bani, sa janih kiến trúc bhian mboh dalam dalam bhap bani dom bangsa adei sa-ei daok di bhum ceik glaong. Ngan haong janih sang bhap bani meng kan ini, pandap piah ngak sang tol rilo meng lac krem la-a, kayau, hala glai… Ini lac dom janih pandap hu dalam glai, nan ye manuac sia dalam sang thei jeng meda hu mbaok tame padang ngak sang bo cang tal thợ tacei pato. Yau nan min sang tol di urang Raglai jeng hu dom janih kiến trúc biak karei.

Meng kan mai, bangsa Raglai bhian daok di bhum ceik glaong, min dalam tukvak dak padang saong cakrok patagok, rilo nyaom urang Raglai panduan nao meng gah Barak tame bhum taneh bahrau. Dalam tukvak ini, dom baoh sang asal neh tabiak truh sang tol atah piah ngak jeng sang tol sit sot 4 tabung, ginup ka dua hadiuk pasang saong dom urang anek daok. Sang tol meng kan di urang Raglai hu padang ngak angaok rilo mbaik gang, meng mbaok taneh tagok tal sang glaong oh tapa sa mét. Tabung sang bhian hu ngak karei saong tuk ngak blaoh meng ba caik tagok khung sang. Baoh sang hu tabung dreih yau sa sruh gilai pakhuak veik, tui dom urang roh duah, kadha nan brei mboh bruk lai tame gauk di ilamo di dom nyaom bangsa hu asal mai meng Nam đảo. Daning gah dalam sang tol, gah iew lac labik tuan alat ragam, daning gah hanuk piah tuan dom mbaik mara, atau dom mbaik to lac pandap lakhah di dom urang likei mai ngak metau di sang kumei. Janih biak karei dalam sang tol di urang Raglai nan lac sang tol prong atau sit, min jeng oh kurang hu mbaik ghang kreih sang, meng tabung sang trun tal haluk.

Ngan haong urang Raglai ini lac mbaik ghang ginreih, kayua lac taong abih adat ieu yang di baoh sang jeng hu rah tabiak vin taom dhal mbaik gheng kreh di baoh sang. Tui hatai saneng meng kan mai di urang Raglai, ghang ine dalam sang nan lac jalan trun tagok di ong akaok ong akei yaok mbang mai haong anek taco dalam dom mbang ngak yang di but pajaih dalam sang. Dalam sang tol meng kan di urang Raglai tuk halei jeng hu ging apui. Meda hu rilo ging apui dalam sa baoh sang tol, min dalam baoh ging praong di po sang tuk halei jeng hu apui khuah. Tapen ging apui, ong amuk bhian daoh khan ka anek taco pang dom kadha damneiy, dalikan, saong dom kadha daoh bhap bani Raglai.

Dom baoh sang tol di urang Raglai mong tapa gah langiu mboh biak laman lamuac, min nyu biak khang kajap. Di kreh glai ram ceik glaong, dom baoh sang tol sit sot, min khang kadang yau hatung hatai di urang Raglai salut mbut, pambuak pagam rai diuk di urang Raglai haong ceik glai saong jeng ala dom tabung sang tol nan, bhap bani Raglai jeng daok khik hu ilamo mbak carak, kadha ngak brei hadah mbaok hadah meta di bangsa drei./.

Urang lang: Jasi - 9/11