Adat uan akaok padai bahrau kak kajap haong rai diuk  di mikva K’ho Srê daok di tỉnh Lâm Đồng meng dom rai ini mai. Adat ini bhian hu peih ngak yaok thun hadei di bilan yuak, likau Yang padai brei ka manuac urang, taong abih baoh sang thei jeng hu lisei huak, hu khan ao angui cuk, dak harei dak hu rai diuk trei sil, haniem phol. Khaol drei duah thau ka ilamu siam gheih dalam adat uan akaok padai bahrau di urang K’ho tapa panuac khan di taha K’Ken, daok di palei Tân Linh, xã Tân Văn, huyện Lâm Hà, tỉnh Lâm Đồng.

           Yaok thun, bangsa K’ho bhian ngak adat uan akaok padai bahrau tuk padai hu yuak blaoh (jaik bilan 12 tal abih bilan 1 thun hadei). Adat ini jan van di abih lac tukvak ba padai tame kho, caik dalam latang (nô lir bong).

Dahlau di tuk yuak padai, po sang khan brei ka yaok baoh sang, gauk gar dalam bon palei thau: Thun ini, sang dahlak yuak padai hu labaih 100 yaot prong, padai bak latang, brah bak kho, sang dahlak peih bruk mbang uan saong daa mikva dalam bon palei mai ma-in bui sambai. Po sang meda ngak sa drei kubao tano prong piah mbang uan. Vụ ini padai biak njauk nan ye nao ieu gauk gar mai daong yuak ka nyu samu. Tal harei sanya, bruk yuak padai jeng salah blaoh, po sang daa mikva dalam palei mai mbang, mai menyum bui sambai uan sa thun mek hu ralo padai brah. Taha palei K’Ken brei thau: ‘’Adat uan padai bahrau lac adat caong khin ka baoh sang hu trei sil, yang padai daong ka khaol drei pala drak njauk, hu ralo padai brah, dom kan kandah jeng tapa abih, sa thun hu trei sil. Uan padai bahrau, likau yang mebang patui veik daong ba, caong ka bilan pala thun hadei baoh sang ngak mbang hu kaya meda jang’’.

Urang K’ho saneng lac: adat uan akaok padai bahrau nan lac tukvak piah ka mikva dalam palei kakuh likau Yang padai daong brei ka puk palei dak harei dak hu trei sil saong sron mbuan. Pandap paling yang padai (Hòi ndu yàng kòi) bhian hu drei menuk, drei pabui saong alak tapai. Dom baoh sang kan kandah ye paling drei menu; baoh sang hu jien jang ye ngak drei pabui.

  Hadei di tuk caga ginup abih dom pandap paling, urang dang tabiak ngak adat ieu yang atau po sang (lac urang likei) peih ngak dom adat cambat uan akaok padai bahrau pak kho padai di baoh sang. Dalam tukvak ini, urang kumei oh brei tame kho, kayua urang K’ho saneng lac: Urang kamei jhak dalam rup, atau lac tal harei tal bilan, meda ngak ka Yang padai (ndu yàng kòi) ganaong, thun hadei oh daok daong ka baoh sang hu ralo padai brah tra. Kayua yau nan ye, tok hu urang likei meng hu tame kho padai piah ngak adat.

Taha K’Ken daoh panuac likau yang padai (Hòi ndu yàng kòi) yau ini: “Ơ yang padai! Caong yang padai mai ini mbang menyum bui sambai haong baoh sang. Harei ini, baoh sang dahlai peih bruk mbang uan akaok padai bahrau, caong khin yang padai  sraong daong, ba brei ka baoh sang hu trei sil, padai mbang oh abih, hu labaih drap ar. Baoh sang daa taong abih dom yang gam haong yang padai brei ka kol dahlak khang tangin kajap takai, ngak mbang hu kaya meda  jang dalam vụ padai bahrau ….Ơ yang!’’

       Tuk iew yang padai blaoh, drei menuk paling yang hu ba nao thik cakoi mek darah luk tagok taong abih labik bo po sang jia lac hu yang mai daok. Dalam kho padai meng bàn thờ tal latang padai, la-I put, naih li-ua prong sit, yaot, angaok baoh pambang…  jeng hu po sang luk darah. Hadei di nan, po sang meng daa taong abih manuac urang mai menyum alak tapai pak di kho brah.

Hadei di nan, drei menuk hu ba nao cúng pak bàn thờ sang daok. Menuk hu am atau tuk, hatai hajai jeng hu ba tagok ngak pandap cúng.

Patui nan, gauk gar, puk palei gam haong baoh sang mbang menyum uan akaok padai bahrau. Urang tadhau ayuh ka gauk, klaih rabha ilamu ngak mbang, caong khin bilan pala tal baoh sang mek hu ralo padai brah jang… Bruk mbang menyum bui sambai dui atah tal kreh melam. Hu sang mbang menyum tal sap menuk tanjaot page mesup harei hadei meng padeih.

Tal urak ini, adat uan akaok padai bahrau di urang K’ho jeng daok hu khik ramik, ngan haong makna gul pataom gauk, uan ka rai diuk hu trei sil, bac megru ilamo   ngak mbang dalam mùa bahrau. Adat ini kak kajap haong bruk ngak padai di urang K’ho Srê.

      Harei ini, mikva bangsa K’ho hu bruk giao lưu haong dom bangsa karei  piah pambuak gauk ngak mbang cakrok patagok, dak padang rai diuk bahrai. Adat uan akaok padai bahrau hu khik ramik nan lac sa kadha siam gheih dalam ilamo bhap bani, ndung bak makna thau dhal phol tal ong akaok ong akei, bac megru ilamo ngak mbng pala drak, uan ka rai diuk diuk trei sil, hu labaih jien padai drap ar, hu pren yava piah ngak tabiak pandap panda, gul pataom puk palei, nan lac sa bruk ngak biak njauk iek prong./.