Bingun Cam klak hu pok brei angan inem mek ye gam gam njauk menuac palai pajoa

Akaok bilan 9/2020, jabat iek gah khik ramik inem mek di tỉnh Quảng Trị tatuak drei mboh 2 dalam 14 bingun kalak ini njauk palai pajoa, lac: bingun Tép (palei Hảo Sơn xã Gio An- huyện Gio Linh) klaoh jaoh rilo labik patau randaih bo urang Cam dak jeng labik pandok ia di gah angaok abih, daok gah dalam bingun piah khik ia urak ini hu ngak jeng mblang hamu pala njam xà lách, patau randaih taglung tabiak kreh bingun saong oh daok padang ia hu.

Bingun Nậy (palei An Hướng) jeng dreih yau nan, saong máng meng patau piah ba ia di gah angaok trun bingun di takai kanyan ka 2 nyu pacah tabiak jeng rilo binah. Sa baoh bingun Cam klak karei di phường Đông Thanh (ban sit Đông Hà), hu pok brei angan inem mek pakat negar, jeng njauk urang palai pajoa biak trak, pabah bingun hu ngak jeng labik caik pandap klaak labaih meng padang ngak.

Daok bingun Cam klak di xã Gio Mỹ (huyện Gio Linh), lac inem mek pakat tỉnh, ye bingun praong jeng labik raong ada, dua bingun sit njauk pacang jalan halau ia.

Ong Nguyễn Văn Song, akaok UB bhap bini xã Gio An khan lac, hu 2 dalam 14 baoh bingun Cam njauk palai pajoa min ong ndom lac: "Dom baoh bingun daok di rilo palei, dalam tuk tok hu 1 urang jakar ilamu iek abih dom bruk pambuak tal gah ilamu di xã. Xã tok ieu, kakei, pathau khan, oh hu ginup menuac nao khik iek dom inem mek yaok harei".

Dalam tuk nan, hu yaok pluh bingun Cam klak karei daok hu rahra khik iek biak siam. Ini lac dom bingun klak daok atah di gauk, sit sot nan ye dahlau daih oh ka hu ba tame harak piah pilih ruah pok brei angan. Yau bingun Cồn, daok dalam palei Hữu Niên A, xã Triệu Hòa, huyện Triệu Phong. Bingun ini daok jaik mblang hamu saong biak atah di palei, menuac sia dalam palei oh daok pandar ia di bingun ini. Min palei ini hu buh jien tabiak padang 1 mblang vil val bingun klak. Pabah bingun hu ngak pasiam veik, phun hijao saong ghế patau hu caik vil taom dar nan ye labik hu bingun dreih yau sa mblang bein. Rilo bingun karei jeng hu bhap bini khik iek yau khik ramik suan yava di palei.

Ong Lê Đức Thọ, Phaok Yam ndok Pasak khik ramik inem mek saong labik mekre hu angan di Quảng Trị, lac :"Meyah labik halei jeng thau sahneng khik caga inem mek yau ini meng caong khik hu yaom glaong di bingun klak". Tui ong Thọ, Karja palei brei hu trách nhiệm pacang cakak saong khik caga ; bruk rilo baoh bingun Cam klak hu pok brei angan inem mek pakat negar, pakat tỉnh min daok njauk palai pajoa nan brei mboh bruk oh sangka khik ramik inem mek di karja dom puk palei’.

Bruk dom baoh bingun Cam klak yau gauk  min Karja pok brei angan inem mek saong taduan bruk khik iek duk saong bruk bhap bini eng drei khik iek tuk oh ka lac inem mek brei mboh  bruk lac "mbuan yau habar oh hu rahra oh ngak hu, kan yau habar hu rahra ye ngak hu salah"./.

Lang sap: Mousa Phương – 12/09