Meng pagaiy mesup, sap Ginang chreih chrai tagok gam saong sap Saranai grauk bhum palei yau ngak pamedeih tagok yang mebhang saong menuac sia daok jaik bimaong, yau brei thau harei Kate hu peih tabiak. Menuac sia ba gauk tagok bimaong Po Sah Ine dak tuk dak rilo. Sa-ai Đặng Thị Tuyền daok di palei Bình Tiến, xã Phan Hiệp, huyện Bắc Bình lac: " Kate biak bui sambai..."

Yaom lac jar var bruk puh cakak min dalam dom harei ini mikva Cam jeng kham merat rami ramik bruk sang piah hu mbaok dalam harei roya praong di bangsa drei. Luac thun glaih glar ngak mbang, ini jeng lac tuk piah mikva padeih padei, taom gaok mikva, adei sa-ai, puk paga. Oh cang hagait praong, yaok urang mai tal ini jeng ba tui hasit pandap yau ye: baoh menuk, patei, atau drei menuk tuk… piah paling yang, brei mboh hatai thau dhar phor. Daok ngan saong mikva Cam palei Ma Lâm 3, ban sit Ma Lâm, huyện Hàm Thuận Bắc –palei hu jao bruk  ngak adat raok khan ao Pô Sah Inư  ye ini lac sa bruk ngak brei hadah mbaok meta nan ye mikva hu mbaok meng dom harei dahlau piah caga ka harei praong ini. Ong Thông Khói daok di palei Ma Lâm, ban sit Ma Lâm, huyện Hàm Thuận Bắc, tỉnh Bình Thuận – sa dalam dom urang dalam mBan peih ngak adat brei thau:" Palay ini taduan raok khan ao po yang..."

Tuk sap hagar, sap saranai dak tuk dak yava atah, jeng lac tuk kapul peih ngak adat raok khan ao Pô Sah Inư meng takai bimaong tagok pabah mbang praong di bimaong. Dalam kapul raok, lingiu dom halau janeng, kapul tamia, kapul nhạc lễ bhap bini Cam, daok hu mbaok dom urang ngak praong pan akaok tỉnh, pan akaok dom sở, ban, ngành dalam tỉnh, tuai damuai saong bhap bini dalam palei. Ong gru harei Thông Minh Toàn daok di xã Hàm Phú, huyện Hàm Thuận  Bắc, tỉnh Bình Thuận urang ngak adat di bimaong brei thau:"Đảng saong Karja biak sangka daong ba...."

Lingiu bruk pataom mbaok tame, maong iek dom adat cambat ndung bak ilamu di urang Cam, pak ini, kol drei daok hu pang yaih khan pandap di palei ngak thủ công meng kan (bruk ngak lan am, bruk menyim) saong hu mbang dom janih pandap mbang meng kan di urang Cam. Lingiu di nan, tuai damuai daok hu mbaok tame dom kadha me-in meng kan yau ye gum meta jan gaok, ndu buk ia nao tapa  chướng ngại vật, yuk Saranai, taong Baranưng. Hu mbaok harei Ka-tê ini, amuk Lê Thị Hà – sa urang tuai mai meng ban raya Hồ Chí Minh brei thau:

 "Dahlak mboh  Ka-tê  ini biak mekre. Dahlak caong yaok thun hu peih ngak yau ini piah anek taco rai hadei thau jang ka ilamu di bangsa drei."

Tui Mban Quản lý bimaong Pô Sah Inư, tuai mai ini dak thun dak rilo jang. Pagap yau thun 2015 hu labaih 100.000 tuai, dalam nan hu labaih 30 riabu tuai negar lingiu. Meng akaok thun 2016 tal urak ini, hu labaih 100.000 tuai saong tui kuhria mboh dahlau, dalam dom harei Ka-tê 2016 ini, hu labaih 7 ribau tuai mai rivang iek. Amuk Lư Thái Tuyên… Phó Ban Quản lý bimaong Pô Sah Inư brei thau: " Dalam dua harei peih ngak Kate, Mban khik iek bimong pambuak saong gha Cong an brei khik salamat..."

Ka-tê  lac harei praong di urang Cam piah hadar tal dom po yang saong likau ka raidiuk hu siam mekre, hajan siam, ngin lagaih, pala drak njauk. Labaih 15 thun tapa, Kate di bimaong Po Sah Inư Bình Thuận hu jeng labik sanya di dom urang anit ilamu Cam saong jeng lac labik mai tal di yaok ribau tuai damuai daok dalam saong lingiu taneh ia./.