Ngak labik ka dar ko mai ngak sruh piah mek ia dar ko lac sa dalam dom bruk ngak mbang di bhap bini daok di glai tràm U Minh hạ (huyện U Minh, Trần Văn Thời, Cà Mau). Bruk ngak ini nyu meda daong ka mikva pak ini duah hu jien labaih sa rituh triệu đồng yaok vụ. Bilan mek ia dar ko yaok thun dui atah dalam luac bilan thu. Piah hu ia dar ko hu angan yau urak ini, dom urang ngak bruk ini  di glai U Minh hạ buh oh takik pren yava. Oh lac labik halei jeng hu dar ko mai ngak sruh, nyu daok tui ilamu di yaok sang.

     Bruk ngak ini hu ame pato veik ka anek dalam glai U Minh hạ. Ini lac bruk glaih glar min duah hu rilo jien. Dom glai dalam taneh glai U Minh hạ lac labik siam di abih piah ka dar ko cakrok, praong tagok saong jeng lac bhum taneh lagaih ka bruk mek ia dar ko.  Piah tame tal labik glai mek ia dar ko, njauk nao tapa rilo kraong biak kan kandah. Ini lac sa bruk ngak mbang di Cà Mau nan ye rilo tuai du lịch mai tal bhum taneh ini meng mboh, meng thau.

    Bilan mek ia dar ko di bhap bini Cà Mau meng bilan 10 (saka ia bulan) saong salah abih di puac bilan thu yaok thun. Dar ko pak ini jhak lô, dom urang nao mek ia dar ko saong dom urang nao tui njauk hu khik caga meng halăm pacang. Sa dalam dom pandap piah mek dar ko lac “bùi nhùi” piah ngak jeng thak pateok dar ko nao dahlau di tuk mek ia dar ko.

    Dom urang bhian randap mek ia dar ko oh p;andar halăm khik caga yau dom urang karei, kayua dar ko nyu randap haong dom urang nan. Sa sruh dar ko hu dua janih lac ia dar ko saong sáp ong. Ia dar ko hu urang mek abih, min sáp ong urang caik veik meneing piah dar ko mai ngak sruh veik. Yaok labik hu dar ko ngak sruh, urang meda mek hu meng 3 - 5 lít ia dar ko yaok vụ.

    Jalan tabiak tuk mek ia dar ko bloh jeng biak kan kandah saong brei hu dom thợ nghề daong brei. Tui dom thợ nghề nao mek ia dar ko lac sa bruk biak chreih, bui. Bruk padam “bùi nhùi” jeng biak hu sangka, kayua ini lac labik duah jien, duah brah saong daok lac trách nhiệm ngan haong glai anit ranam bo rilo rai ong muk amaik me kak kajap haong nyu.  Dar ko hu bhap bini pablei di sang yaom 400 ribau  đồng yaok lít./.