Dalam bein ilamo di bhap bani Khmer hu rilo adat cambat prong dalam thun. Dom bruk ngak ini oh kurang hu dom À Cha dang tabiak tacei pato ngak adat.

“À Cha” nan lac dom urang hu bac megru, hu ilamu prong dalam, thau cambaih ka Phật pháp saong adat cambat tanarakun di bhang sa Khmer. Langiu di nan, À Cha daok lac menuac gheih ndom puac ka urang pang tui saong hu angan je ngan haong mikva dalam phum sóc, hu manuac sia iek prong.

Ong Sơn SôPhia daok di ấp Phù Ly 1, xã Đông Bình, bal sit Bình Minh, tỉnh Vĩnh Long brei thau, ngan haong mikva Khmer, tuk sang hu ngak adat hagait, yaom lac prong atau sit jeng oh kurang hu À Cha. Yaok adat cambat hu peih ngak tui 1 jalan karei di gauk. Tuk peih ngak, yaok adat meda hu dom kadha meroi karei di gauk. Kayua yau nan ye, bruk ngak di À Cha lac dang tabiak tacei pato njauk haong yaok adat.

Meng bruk thau praong, dalam di dreri, dom ong À Cha meda tacei pato jalan rami ramik, ba caik pandap panda paling yang yau habar ka nyu njauk. Taphia di nan, À Cha lac menuac ba akaok pok sap bac dom bài kinh ka nyu njauk haong yaok adat piah ka  urang puac tui.

Langiu di nan, dom À cha jeng bhian hu mbaok tame bruk pato akhar Khmer ka dom anek kamuan dalam phum sóc, rik daong tame bruk khik ramik panuac ndom, akhar vak saong ilamo meng kan di bangsa drei. Taphia di nan, dom À cha daok hu tacei pato rai rah dam dara thau anit ranam saong iek prong bruk khik ramik dom ilamu meng kan di bangsa. Hòa Thượng Thạch Suông, urang dang kaok baha Kom Pong Ni Krốt Kom Pong Chrây, huyện Châu Thành, tỉnh Trà Vinh taong yaom: dalam baha hu MBan khik iek lac dom ong À cha, bruk ngak di dom À cha biak prong daong ka baha jeng yau dom bruk dalam bhap bani, phum sroc... Dom ong ini rik daong pathau khan saong pato pakai ka mikva Phật tử, abih di nyu lac dom rai rah dam dara njauk plaih njaik dom bruk kanjah jhak dalam rai diuk, ngak bruk siam ka menuac sia.

Lingiu di nan, meng angan je di drei, dom À cha daok hu rilo rik daong dalam bruk pathau khan, jak ba bhap bani tuk pambuak bruk haong karja palei khan brei thau ka adat hukum, jalan ngak, sarak di Đảng saong Karja tal mikva urang Khmer dalam phum sóc. Hu mbaok tame langyah dom bruk kandah gauk,  meriak gauk di mikva drei. Tapa nan, brei mboh bruk ngak di dom À cha lac biak prong dalam rai diuk di bhap bani Khmer, njauk hu pato pakai patui veik saong patagok. Kayua nan lac sa dalam dom urang rik daong tame bruk khik ramik saong cak rok patagok ilamo di bangsa./.

Urang lang: Jasi - 25/5/2021