Gai duh Tân Sơn siam, kajap, rilo janih, hu ngak meng tangin. Bruk njauk biai nan lac, gai duh hu sơn meng hala kayau nan ye nyu hadah jangaih bo oh huac jru mek tuk pandar suia lavik. Dom mbaik gai duh tapak sumu gauk, dua gah akok vin, ia sơn hadah jangaih min mbuan pan. Kayua yau nan ye, gai duh Tân Sơn hu rilo urang blei takre.

Maong tame gai duh drei pandar yaok harei sahaneng lac mbuan ngak, min piah ngak hu yau nan, dom urang ngak gai duh di labik ini brei tapa 12 công đoạn meng ngak hu gai duh. Meng dom mbaik kayau, urang kagaik sit atah katut karei di gauk, blaoh ba tame mac tiện veik. Patui di nan lac thah ka nyu jangaih, khử trùng, nyom, pambu thu, khảm xà cừ…Taong abih dom bruk nan hu ngak meng tangin biak tani tanat piah gai duh hu mekre. Urang iek gai druh oh lac pandap pandar dalam salao huak bo daok lac ilamu di bhum taneh Tân Sơn nao tal yaok urang.

Bruk ngak gai duh dak harei dak cak rok patagok, hu jeng bruk duah jien tame tani tanat ka rilo baoh sang di Tân Sơn. Meng bruk ngak gai duh, rilo sang di palei hu raidiuk tani tanat, hu sang yam tagok ngak kaya meda. Sa-ai Nguyễn Văn Hồ, Trưởng ban Tài chính - Kế hoạch huyện Ninh Sơn brei thau ka bruk cak rok patagok di bruk ngak gai duh  di labik ini: “ Urak ini, Tân Sơn hu jaik 500 baoh sang ngak gai duh, ba bruk ngak ka 900 urang di palei. Meng yaom jien duah hu yaok bilan meng 3,6 triệu tal 5 triệu đồng sa urang hu pachreih urang tui bruk”

Cak rok patagok samar  yau nan, min bruk ngak gai duh di Tân Sơn jeng gaok rilo kan kandah. Sa-ai Trần Lộc khan lac: “Yaom kayau piah ngak gai duh dak harei dak glaong saong takik hu. Khol dahlak oh pandar kayau meda kayua kayau meda ngak gai duh oh siam. Ini lac bruk kan kandah ngan saong urang ngak gai duh.”

Piah ka bruk ngak gai duh di Tân Sơn patagok khang kajap, huyện Ninh Sơn daok kham merat dak padang ngak angan je di huyen lac gai duh Tân Sơn siam saong hu labik dang di darak pasar. Rilo sarak piah daong palei ngak yau  daong phun jien ka dom bsang ngak gai duh,  tanut chuan ka gai duh, padang bhum nguyen lieu suai lavik ka bruk ngak gai duh, duah labik pablei tani tanat ka gai duh./.