Tok pasang bangsa Raglai daok di palei Bà Râu, xã Lợi Hải, huyện Thuận Bắc yau nan ye sa-ai Nguyễn Thị Tốt thau hu dom kan kandah di dom adei sa-ai tuk ngak bruk Kapul urang kumei di palei. Rilo adei sa-ai sang kan kandah, oh hu sang daok, sa-ai likau xã, jak ba dom doanh nghiệp daong brei ngak sang ka dom urang kumei kan kathaot. Yau ye sang muk Pi Năng Thị Nương daok palei Ấn Đạt. Thun ini umo jaik 80 thun min mbiah tal urak ini meng hu sang piah pandaok pacang pandiak, pacang hajan. Baoh sang hu ngak abih labaih 22 triệu đồng kayua sa-ai Tot nao jak ba dom doanh nghiep rik jien tame daong ngak brei. Sa-ai Tot daok jak ba dom adei sa-ai dalam kapul nyaom urang kumei palei Ấn Đạt rik jien blei tu, ghe lanieng ndih alin ka muk. Muk Pi Năng Thị Nương, xã Lợi Hải, huyen Thuan Bac, tinh Ninh Thuan brei thau:

“ Drei biak bui sambai tuk hu sang saong daok hu brei tu, brei gaok glah 4 baoh tra. Kurang hagait Tôt nyu duah brei abih. Dahlak biak thau dhar phol. Meng hu yau nan, dahlak oh daok rambah tra”

Amuk Katơ Thị Chim, xa Lợi Hải, huyen Thuận Bắc, tinh Ninh Thuận ndem ka sa-ai Tot yau ini:

“ Hu sa-ai Tot ngak bruk gah kapul urang kumei nao duah likau jien mai daong ka dom adei nao bac. Daong ka mikva dalam palei biak ralo. Sang ini kan kandah lô, hu sa-ai Tot sangka daong, anek bik ruak kik jeng hu sa-ai Tot ba nao iek ruak. Rilo baoh sang karei jeng yau nan.

Tuk karja palei jak ba mikva nao ngak bruk pak negar langiu piah patagok  jien mek tame, sa-ai Nguyễn Thị Tốt nao tal yaok palei piah pathau khan jak ba mikva Raglai khang hatai tut angan nao ngak bruk. Camereip, mikva biak huac kayua oh thau sap negar langiu jeng yau atah sang danaok oh khin nao, sa-ai Tot duah taom gaok amaik ame, but pajaih langyah. Meng nan, mikva meng tut angan nao ngak bruk pak negar langiu, rilo urang ngak duah jien payua mai daong sang danaok drei. Sa-ai Pi Năng Thị Đi, xã Lợi Hải, huyen Thuận Bắc, tỉnh Ninh Thuận lac:

“ Tuk sa-ai Tot mai jak ba ye  dahlak nao ngak bruk saong jien bian 10 trieu. Hu jien bilan yau nan sang dahlak jeng bayar hu sre. Hadei di nan payua veik 20 trieu tra. Sang jeng rambah lô, oh hu bruk hagait ngak. Nao atah mboh haduh hatai, kayua oh thau sap negar langiu min hu bac dahlau, nao mboh sahanang hatai.Duah hu jien raong anek bik mbang bac. Drei mboh meng nao ngak bruk negar langiu duah hu jien tani tanat ka sang.”

Langiu di nan, sa-ai Tốt daok lac urang dalam kapul langyah ba siam di xã. Tuk mehit adei sa-ai kumei halei sang taong paoh, sa-ai nao duah thau saong daong  chip. Hadei di nan, khan brei cong an palei thau piah daong khik caga ka dom adei sa-ai kumei nan. Yau ye sa-ai Patâu Asah Thị Loan daok di palei Ấn Đạt. Tuk mebuk alak, pasang di sa-ai bhian taong diuk saong jan pandap pandar dalam sang. Tuk kaoh gauk, pabha pandap pandar,  pasang oh brei limo, lac limo nan kayua amaik ame brei ka eng sa-ai. Sa-ai Tot langyah daong sa-ai Loan tui jalan bayar jien raong limo dalam 8 thun lac 25 trieu dong saong jien raong anek bik mbang bac yaok bilan. Meng nan, sa-ai Loan meng khik veik hu dua drei limo nan:

“Dahlak rambah ye bo pandap pandar dalam sang njauk pasang jan abih. Urak ini dahlak mboh siam jang meng hu sa-ai Tot bhian mai daong langyah pachreih yam tagok ngak mbang, tani tanat raidiuk.”

Sa-ai Tốt khan lac: Ngan saong urang kumei Raglai, khin ka mikva jia drei brei ngak dahlau dalam dom bruk, dauh thau hatai  sahaneng saong bruk caong khin di mikva.

“ Dalam tuk ngak bruk, dahlak biak sangka tal dom adei metui, urang taha daok sa drei. Dahlak bhian mai jak ba, tal sang piah langyah ba siam dom bruk kandah gauk. Ngak habar piah diuk pasang anit ranam gauk, ba gauk ngak mbang raong anek bik bac da-a tal labik tal dhua”

          Yaom lac hu taong yaom glaong dalm dom bruk ngak min sa-ai Tot tuk halei jeng mboh lac drei njauk kham merat rilo jang piah ngak siam bruk ngak di drei. Hadah mbaok meta ka sa-ai tuk hu Kapul urang kumei Ninh Thuan palih ruah nao hu mbaok dalam Nyaom roya urang kumei pakat negar mbang 12, tukvak 2017 -2022 saong hu palih ruah lac sa dalam 100 urang kumei naih gheih dalam dom bruk ngak./.