Tamia Cam hu parang me-in dalam tuk mbang Katê,dom harei Rija…Tapa tamia, urang brei mboh hatai jai di drei, brei thau hatung hatian di menuac sia dunya ngan haong lot daih. Dom ragam tamia yau ye: tamia kadik,tamia tanyiak, tamia hawei, tamia juak ui,… urak ini jeng daok hu ong Ka-ing; amuk Pajaw tamia dalam dom harei rija di urang Cam. Nghệ nhân Ưu tú Đàng Quang Dũng – urang jakar di Sang ilamu uraniah quận 5, ban raya Hồ Chí Minh brei thau: "Njauk brei khik ramik saong patagok ilamu Cam..."

Lingiu dom ragam tamia, urang Cam urak ini daok khik hu rilo ragu daoh bhap bini biak gheih, biak bingi pang. Rilo ragu daoh lai li-an, ngak megei hatung hatian menuac urang yau ye: Thei mai; Anit ralo; Daoh dam dara… Lingiu di nan, urang Cam daok hu dom ragu Ariya, lac daoh atah tui jalan dak dalikan saong daok hu rilo ragu daoh ru. Yaok sa Pô Yang, yaok sa Pô Patao jeng hu sa ragu daoh saong sa ragam tamia  karei. Biên đạo Mai Kiên – Đoàn Ca múa nhạc Biển Xanh Bình Thuận brei thau:  "Dalam dom rija di urang Cam, tuk halei urang jeng sahneng mboh dalam akaok lac hu dom Pô Yang ba mai haniem phul ka anek menuac."

Angaok jalan mbeik drei khang tame dunya yau urak ini gam saong bruk cakrok biak khang di kinh tế thị trường ye dom yaom glaong di ilamu nghệ thuật daoh tamia Cam daok mbuan si lihik nao. Bruk khik amik, cakrok patagok daoh tamia Cam lac bruk praong, njauk ngak. Phó Giáo sư – Tiến sĩ Trương Văn Món, urang oato di sang bac Đại học Khoa học Xã hội saong Nhân văn ban raya Hồ Chí Minh brei thau:  "Ngak tui jalan tacei di Đảng lac khik ramik saong cakrok ilamu Cam yau habar ka nyu siam dalam tuk mbeik drei tame dunya yau urak ini. Abih di nyu nan lac bruk peih ngak Sarak Trung ương V di Đảng. Khik ramik yau habar ka nyu njauk saong cakrok, patagok glaong yau habar ka nyu njauk, ka nyu mekre. Urang oh phủ nhận bruk ngak ka nyu bahrau piah pok paglaong min ngak bahrau yau habar jeng daok khik hu ilamu meng kan di bangsa Cam."

Caong lac meng bruk sangka saong ba tabiak jalan ngak njauk, lagaih di Karja, gam saong bruk ba tangin tame di gah chức năng saong hatung hatian di dom urang daoh tamia Cam, ye ilamu nghệ thuật daoh tamia bhap bini Cam  hu khik ramik saong cakrok patagok, pabak siam jang ka raidiuk di rilo mikva urang Cam./.