Meng kan mai, Tết thanh minh (adat rivang  kabo) hu jeng ilamo tâm linh dalam rai diuk bhap bani  Dao bhong Yên Bái. Ini  oh lac tukvak piah ka anek kamuan thau dhal phol  urang lahik, bo daok lac piah likau ka sa thun angin siam hajan laghaih, mek hu ralo padai brah.             

          Tết thanh minh di bhap bani Dao bhong bhian hu peih ngak di akaok bilan dua, bilan klau sa ka aia bulan. Oh lac tết praong dalam thun, min ini lac ilamo oh kurang hu dalam rai diuk tâm linh di urang Dao bhong. Bruk nao rivang kabo di urang Dao bhong hu peih ngak 3 thun sa mbang atau gam gam dalam 3 thun, tui bruk di yaok baoh sang. Ong Triệu Tiến Kim, urang thau cambaih ka ilamo bangsa Dao bhong di xã Phúc Lợi, huyện Lục Yên, tỉnh Yên Bái brei thau. Urang Dao bhong khaol dahlak saneng lac meyah ngak tết thanh minh ye njauk ngak adat rivang kabo. Kasa lac piah ka anek taco ramik paisma veik sang bahrau ka ong akaok ong akei, ka dua  lac caong khin ong akaok ong akei daong ka anek taco ngak mbang ginup meda, sang danaok siam mekre, rai diuk trei sil salamat. Tapa nan brei mboh ilamu menyum aia hadar tal halau aia meng kan mai di urang Dao bhong khaol dahlak.

      Piah caga ka adat nao rivang kabo hu rah tabiak njauk tukvak, baoh sang njauk caga dom janih pandap panda kaya mbang yau: brah ndiuk, rilo pabui, baoh karaoh, jien ba-ar, abih di nyu lac menuk tuk lac janih pandap oh kurang hu dalam talam salao ngak adat nao rivang kabo. Taong abih dom janih pandap ini jeng hu po sang ngak tabik. Urang Dao bhong saneng lac yau nan meng brei mboh hatung hatai di anek taco ngan haong urang lahik bloh. Hadei di tuk taong abih janih pandap hu ba caik dalam talam salao ye gru ieu yang haong dom urang dalam sang ba talam salao nan nao caik anak kabo, mek bộ gõ (lac pandap cúng) taih klau mbang piah khan brei muk kei, urang lahik brei adat ka anek taco  ramik veik sang danaok, ngak hareik, tuh haluk tagok mbaok kabo. Anek taco cuh sa pok gilau ba kluak vin taom dhal kabo.

      Hadei di tuk ngak adat saong rivang kabo salah blaoh, lac tal adat pathau khan  amuk akei pak sang, saong sa talam salao cúng hu po sang caga blaoh. Gru ngak Yang lambaok ka po sang pathau khan saong da-a muk kei mai taduan mek pandap panda di anek taco dalam sang. Adat paling ini rah tabiak dalam jaik 30 minit, dalam nan hu pathau khan bruk sang ngak lễ tết thanh minh, hu ngak salah blaoh bruk nao rivang kabo saong pok daa ong akaok ong kei mai raok tết thanh minh haong anek taco. Tuk adat pathau khan ong akaok ong akei hu ngak blaoh, gru ngak yang cuh jien ba-ar daa ong akaok ong akei daok veik mbang tết haong anek taco. Pandap paling yang hu po sang ramik trun blaoh ba tabiak adei sa-ai dalam sang mbang menyum pataom mbaok gauk dalam harei tết. Amuk Lý Thị Phin daok di palei Khe Giang, xã Trúc, huyện Lục Yên, tỉnh Yên Bái brei thau: Harei ini sang dahlak ngak adat nao rivang kabo ka gauk gar dalam sang, nan lac nao rami ramik veik kabo ka nyu bahrau, ka nyu siam, ngak hareik vin taom dhal, adat ini hu sang dahlak peih ngak meng lavik mai, ini lac ilamo gheih mekre ndung bak  hatai anek menuac. Dahlak hu pato anek kamuan khik ramik veik janih ilamo ini ka rai rah harei hadei.”

     Tết thanh minh di bhap bani Dao bhong ndung bak dom yaom glaong ilamu. Jeng meda lac mai meng nan bo bhap bani Dao bhong tuk halei jeng iek prong, khik ramik, pato veik ka rai rah ini tapa rai rah hadiah./.