Urang Lô Lô sahaneng lac muk kei, ong muk, amaik ame…dom urang ndih tapui tabiak drei hu buh prein yawa padang mbang ngui hu yau harei ini. Langiu di nan, muk kei daok buh prein yawa khik caga puk paga, daong ka palei pala hu raidiuk trei sir, haniam phol.

Tui adat cambat, tuk sang hu urang metai meng 3 tal 4 thun, anek kacua dalam sang meda padang papan kakuh muk kei saong raok suan tagok papan kakuh, padang angan je thaok binguk piah kakuh. Papan kakuh muk kei hu caik pagam danieng bilik kreh sang, anak pabah mbang tame tabiak. Angaok nan caik dom kali meng kayau piah brei mboh suan yawa muk kei. Urang Lô Lô bhian paling pandap kakuh muk kei di bilan mat yaok thun. Urang meda paling kakuh di sang hu mbaok dom gauk gar dalam sang. Daok tuk ngak yang  di kalan palei ye taong abih dom baoh sang dalam palei meda rik pandap tame saong peih ngak yang haong gauk.   

Bhian di nyu, Adat paling pandap da-a muk kei di Lô Lô hu 3 bruk praong nan lac adat paling pandap, adat hadar saong adat palao muk kei. Tame ngak yang, gru brei ngak adat paling yang, meroi da-a muk kei mai hu mbaok haong taong abih urang dalam but pajaih saong bhap bini. Hadei di nan, urang Lô Lô brei peih ngak ngak adat taong hagar ban ka abih gauk tamia tui sap hagar, hadar tal dom urang lot diah anak papan kakuh. Adat palao muk kei hu rah tabiak puac abih. Tuk ngak adat brei taong hagar tagok  blaoh cuh apui kreh mblang piah gru da-a yang meroi likau khan tal muk kei bruk po sang paling pandap piah palao muk kei tagok langik. Kadha meroi da-a yang  hu dom panuac lang kan likau muk kei taduan pandap saong likau muk kei chrong daong ka anek kamuan di dunya alot ini. Hadei di nan, cuh jien, ameh ba-ar, adat paling kakuh hu tamat di subuh page.

Hadei di var ngak adat, po sang da-a abih urang mai huak, menyum alak saong baoh sang. Taong abih dom pandap paling hu parabha ka abih gauk yau panuac thau dhar phol di po sang tal taong abih urang hu mbaok daong baoh sang ngak adat.

Dalam hatai sahneng, urang Lô Lô ba Adat paling pandap da-a muk kei tame dom adat cambat dalam raidiuk. Langiu makna pato pakai bhap bini hadar tal halau gha, thau dhar phol muk kei, pato jalan diukrai menyum ia hadar tal halau ia, adat kakuh muk kei daok pamuak bhap bini, baoh sang, but pajaih, palei pala. Meng jalan ngak adat biak gheih, ndung bak ilamu bhap bini hadah krah, urang Lô Lô hu rik tame ngak brei ilamu Viet Nam hu rilo janih jang saong gheih mekre jang./.

Urang lang: Ai Nghiem – 04/06/2022