Tui bruk di yaok baoh sang, urang Ê Đê meda ngak adat mek baoh kaong ban piah likau pagun sanya veik tal tuk lagaih. Pagap yau tuk sang mek hu sa jak jeng halei nan, dalam tuk ieu yang dahlau di nan hu sanya lac meda ngak sa drei kubau tano saong 7 tapai alak piah ngak adat thau dhar phol ong akaok ong kei. Min dalam tuk caga ye po sang gaok dom cuang kandah ka langik tasik, bilan yuak kuak, nan ye cang tal bilan thu meng ngak. Tuk nan, urang lahaiy meda mai daong prein blaoh gam taong chieng, manyum alak tapai, huak lisei mbang ralaow haong po sang. Yau nan, po sang brei ngak adat cuk kaong ban piah likau kadun veik harei ngak adat thau dhar phol. Tui jien padai di sang, po sang meda ngak adat haong drei pabui atau drei limo piah likau harei kadun veik haong po yang tame ngak di sa tukvak karei lagaih jang.

Baoh kaong ban daok lac pandap pagun sanya ngak lakhah di dom likei, kumei urang Ê Đê tuk tal umo thun tok diuk tok pasang. Tui nan, tuk khin gauk, urang kumei meda ndem haong amaik ame nao tal sang likei ngak adat jao kaong pagun sanya gauk. Pandap ieu yang tui hatai caong di sang gah likei, min brei hu 8 baoh kaong ban saong sa blah “chăn địu”, brei mboh hatai thau dhar phol di urang kumei saong amaik di pasang kayua hu raong, pato anek likei jeng manuac jeng urang.

Dalam tuk ngak adat, baoh kaong ban hu makna yau baoh karah lakhah, hu lambaok dua gah sang jao ka gu likei kumei haong panuac kakei ka bruk lakhah caga, bruk ndom puac daok dang haong gauk tuk jeng diuk, jeng pasang. Ini jeng lac pandap brei mboh ka panuac pagun, panuac sanya di gu likei kumei anak po yang saong anak bruk maong mboh di rahra. Tuk likei, kamei gaok tangin tame baoh kaong ban saong jao ka gauk ye dua urang nan jeng diuk jeng pasang, meng nan 2 urang hu daok haong gauk tal abih rai ngak manuac. Mayah sa dalam dua urang oh ngak yau panuac pagun sanya ye njauk biyar veik baoh kaong ban saong njauk phat jien gilac ka sang urang daih glaong jang dua mbang atau klau mbang yam jien pandap “hồi môn” hu ba tabiak dalam harei ngak adat pagun sanya.

Dalam adat pambuak talei rohim, baoh kaong ban yau sa pandap pagun sanya pambuak haong dom puk palei, di dom urang oh thau gauk jeng randap haong gauk, pambuak hatai anit ranam di dom baoh sang urang Ê Đê haong sa urang oh njauk lac ralaow darah haong gauk. Tuk nan, sang hu jao ka urang adei saai pambuak talei rohim baoh kaong ban yau sa pandap pagun sanya, brei thau lac urang nan jeng sa urang dalam sang, lac but pajaih. Dua gah hu pambuak yau ralaow darah gam klah rabha ka gauk dom bruk bui sambai, atau bruk kan kandah, tavak tavaiy. Urang hu pambuak talei rohim jeng hu bruk ngak yau dom urang adei saai dalam but pajaih di sang ngak adat pambuak gauk.

Tuk ngak adat ieu yang, ong gru puac panuac likau, gam ba tangin tame pan baoh kaong ban piah cuk tame takoi tangin urang hu ngak adat. Nan yau sa pandap piah ka po yang daong pacang ka po di baoh kaong. Hadei di yaok mbang ieu yang, baoh kaong ban hu sarak inem mek samu haong dom tapai alak bo po sang pandar piah ngak adat, bhian lac 3,5 atau 7 inem mek. Dom urang pandar baoh kaong sarak 7 inem mek lac urang biak jak jeng saong hu rilo jien padai, drap ar, hu angan je dalam rahra. Dom baoh kaong nan hu khik piah ka yaok urang, gaok mai, tal tuk metai, baoh kaong ban hu tui po di nyu nao tapa lot deih.

Urak ini, yaom lac dom adat oh daok rilo yau dahlau deih min di tỉnh Đắk Lắk, baoh kaong ban jeng daok hu khik piah yau sa pandap biak hu yaom glaong. Tuk hu mbaok dalam dom adat, nyu jeng pandap biak hu yaom glaong hu yaok urang jao ka gauk yau sa adat cambat gheih mekre hu khik ramik./.