Tuk baoh sang atah hu salah blaoh, alak tapai hu rak pahe bangi, kaya mbang huak brei duh paling hu caga ginup, tal harei gheih bilan siam, adei sa-ai but pajaih atah jaik hu mai pataom mbaok, urang bangsa Randaiy peih adat tagok tame sang bahrau tui adat cambat bhap bini bangsa.

Dalam sap caing Knah sameng chreih chrai, adat tagok tame sang bahrau urang bangsa Randaiy di labik gah Pei tinh Dak Lak hu ngak dua banah adat hu makna lac: duh paling yang mebang, mukkei saong duh paling likau prein yava ka po sang. Tui ong Y Min Kbuôr, daok di mbon palei Cuôr Kắp, phuong Tân An, adat tagok sang bahrau lac adat mbaoh tangin ka baoh sang hu salah blaoh saong likau bruk sraong daong di yang mebang.

“Baoh sang hu padang blaoh ye urang ngak adat duh paling yang piah likau Po sraong daong ka baoh sang saong po sang hu salamat, khang kadang, ngak mbang hu, raidiuk karo kajap trei sir ginup bak”.

Adat hu camreip di bambang tho gah Pur di baoh sang. Tui urang bangsa Randaiy, ini lac gah raok tanrak hadah ia harei, brei mboh ka prein diuk saong bruk peih camreip. Tuk kaya duh paling hu brei parang tagok, sap gong caing yava tagok, ong gru kamaon da-a dom yang, dom yang mebang pasang iek taneh langik ceik glai, gam haong mukkei ong amuk mei mai, mbaoh tangin baoh sang bahrau saong sraong daong ka baoh sang.

Patui di nan daok hu lac adat duh paling yang Po likau brei prein yava ralo ka po sang, ini hu maong yau lac hu makna dalam adat tagok sang bahrau. Diuk pasang po sang daok di anak salao duh paling, pamaong tal gah bambang tho gah Pur. Ong gru kamaon ieu yang mabang, blaoh hadei nan nao tal caih tapai patui veik ngak adat, jao brei alak tapai, puac panuac saong cuk kaong kang, likau prein yava khang kadang, raidiuk karo salamat, padai ginup gilang, caing caih ginup bak. Ong Y Siong Êban, daok di mbon palei Ko Tam, phuong Tân An brei thau: “Tuk tagok sang bahrau ye tui adat brei duh paling prein yava piah tadhau ayuh prein yava ka po sang tuk halei jeng ginup bak, bui sambai, tuk halei jeng hu prein yava siam. Adat cambat di urang bangsa Randaiy lac yau nan ye, hu sang daok bahrau ye brei tadhau ayuh prein yava ka po sang”.

Sa adat oh kurang hu lac duh paling ka dom kaya dalam sang. Meng pakat sang, ging apui tal caneng, kik, caih tapai jeng hu ba tame ngak adat, payua hatai je lac yaok ndap nda nyu nao pagam, pacang khik ka baoh sang dalam raidiuk yaok harei. Bruk ini brei mboh baoh sang oh lac sa labik piah ndih daook blaoh nyu hu binguk yava, hu bhap bini saong yang mebang hu mbaoh tangin.

Luac dom adat, sap caing Kanah yava tagok tui yaok ragam karei gauk, njauk lagaih haong yaok tukvak duh paling. Dom urang nghe nhan dalam mbon palei khik bruk hu makna, khik kajap adat hu ngak njauk, khik tamo ilamo bangsa. Tamat blaoh adat cambat, po sang, but pajaih saong tuai damuai pataom gauk vil caih ia tapai, menyum alak haong gauk tui adat da-a alak meng kal. Sap caing patui veik hu yava tagok, hlai haong sap ndom klao, ngak jeng arthak chreih chrai, pambuak pagam bhap bini.

Dalam jaman ndo thi hoa saong pambuak ilamo dak harei dak khang, bruk khik tani tanat adat tagok baoh sang bahrau oh lac daong khik ramik ilamo bangsa Randaiy, blaoh daok peih tabiak jalan pandar ilamo bhap bini pagam haong jirah rivang bhap bini, jirah rivang ba drei tame. Tapa di nan, dom baoh sang atah oh lac daok dalam inem krung, blaoh daok patui veik hu pandar dalam raidiuk urak ini di bhum taneh Tay Nguyen./.