Festival bangu mai anh ndao hu angan “Lũng Cú – Labik rilo sambo bangu” bahrau peih tabiak di xa Lũng Cú. Ini oh lac sa mbang sanya maong iek bangu bhian, blaoh daok lac panuac ieu da-a tuai damuai mai tal bhum gah Barak abih piah maong iek bruk gheih ghang di langik ceik glai hlai haong ilamo bangsa di Cao nguyen patau Đồng Văn.

Dalam bruk rilo sambo di bangu, tuai damuai jirah hu maong iek dom bruk jirah rivang tapa danak dak adaoh tamia bhap bini; rivang me-in labik parang thaik gheih cuak gilac tukvak salih bilan; ba drei tame bruk ngak meng tangin bhap bini yau ye se lanh, menyim lanh, jhik takhaok khan bai di bangsa Giáy atau cih thaik kaling dalko gheih ghang di bangsa H’mong. Tuai damuai jirah meda cuk tame rup dom khan ao siam gheih di dom bangsa piah khik dom thaik thaot inem mek taphia sambo bhong di bangu mai anh ndao; ba drei tame arthak chreih chrai haong tamia khèn, katung talei, taong yến atau dom kadha me-in bhap bini biak karei. Langiu di nan lac ilamo kaya mbang bhap bini ndung bak ilamo Lũng Cú. Meng pahe bangi di mèn mén, pahe bangi di dom kaya njam glai, tal pahe bangi di thắng cố ralo limo, ralo tuel di ging, ndiuk lime sambo bar…Bruk hlai di thaik thaot, menuac urang saong ilamo daong ngak jeng prein dui pachreih karei ka sa raya gheih ghang siam mekre.

Festival hu caik dalam bruk patagok jirah rivang di bhum ceik glaong Cao nguyen patau Đồng Văn – bhum drap ar taneh riya saong ilamo hu UNESCO brei angan lac Bein bangi Taneh riya pakat dunya. Yaok labik mai di ini jeng ba tui sa kadha ka sajarah yaok trieu thun, raidiuk jeng yau bruk randap lagaih karo di menuac urang saong ilamo hu khik ramik tapa rilo rai rah…

Yam tame thun bahrau 2026, bruk jirah rivang di Tuyen Quang samar hu peih tabiak meng danak dak raok dom tuai damuai akaok meti mai “rao taneh” rah tabiak di Mblang bein raya Nguyễn Tất Thành. Ini lac bruk hu makna ka bruk peih camreip lagaij, brei mboh kham merat di tinh dalam bruk ngak bahrau ndap nda kaya, paglaong rah rivang saong raok tuai meng tuk akaok meti di thun bahrau.

Dom thun tapa, Tuyen Quang oh padeih salih bahrau jalan sahaneng saong bruk ngak jirah rivang, pataom buh jien tame ka ha tang, ngak rilo ndap nda, paglaong asar siam jitvu, sangka iek praong patagok jirah rivang pagaam haong khik ramik saong patagok ilamo siam gheih bhap bini, pacang khik labik sinh thai, paglaong bruk ngak mbang ka rahra bhum palei. Rilo ndap nda jirah rivang hu angan di bhum palei dak harei dak hu tuai damuai jirah di dalam saong langiu negar thau tal, palih ruah blei.

Dalam nan mboh di nyu hu thun 2025, Tuyen Quang hu pok meyaom di rilo yai thuong jirah rivang dalam negar saong dunya. Bein bangu Taneh riya pakat dunya UNESCO Cao nguyen patau Đồng Văn hu palih ruah lac labik mai dang akaok di chau A saong dunya; Palei ilamo jirah rivang bhap bini Lô Lô Chải hu mbaoh tangin lac palei jirah rivang bhap bini siam abih di dunya, rilo labik jirah rivang sinh thai, bhap bini mek hu yai thuong ASEAN saong negar… Ini lac kein lagaih hu makna piah Tuyen Quang patui veik cakrok dalam tukvak patagok bahrau.

Thun 2026, Tuyen Quang brei mboh patagok jirah rivang patui veik lac bruk hu makna, pamaong tal patagok hacih hijao, karo kajap, tani tanat saong meda ilamo, hu jalan ngak raok labaih 4,1 trieu mbang tuai damuai. Kadha “Tuyen Quang – Jalan hacih hijao, rivang me-in ilamo, pambak anit ranam” brei mboh tantu hatai caong padang thaik thaot labik mai salamat, dui pachreih, karei saong ndung bak drut druai. Yaok labik mai tal oh sa janih lac labik rivang me-in blaoh daok lac labik ba drei tame, yaok sa ndap nda jirah rivang ba mai yaom kaom kinh te blaoh daok daong khik ramik langik ceik glai saong ilamo./.