Dalam tuk bhap bani di palei K’răng Gọ (daok di xa Quang Lap) panduan salih tapa ngak (pala njam patam panak harei), amuk Ma Ly jeng jan van haong bruk harin haluk, tapat lan gluh piah ngak tabiak dom janih ndap nda lan am meng kan. Anak mblang sang di amuk dreh yau labik sang ngak ngan haong ginup abih ndap nda piah ngak, gagrong dak parang caik, labik am cuh lan.

Thun ini umur labaih 70 thun, amuk Ma Ly jeng oh kanar hadar drei thau ngak lan meng tuk halei mai. Amuk Ma Ly klah rabha, piah ngak tabiak dom janih ndap nda lan am siam gheih, amuk njauk nao tagok dom mbuan ceik piah mek taneh haluk mai sang jan klik blaoh hrin patom, palih mek dom asal klik di abih; hadei di nan meng ba tame tapat, ngak jeng mbaok meta janih ndap nda lan am. Kadha biak karei di lan am Churu nan lac dom ndap nda ngak tabiak oh caong khin hu pan pa-yeng tuk ngak jeng thaik vin, bo urang ngak njauk nao vin taom dar, tangin uak tapat piah ngak jeng ndap nda hu thaik binguk karei di gauk. “Hadei di tuk ba pambu ka thu rilo harei, lan gok meda ba nao am cuh meng njuh brei ka nyu suai piah ka nyu tathak, khang hu suai lavik, duh ka taong abih caong khin di urang pandar piah kluak bingi, caik kaya mbang me-nyum”.

 Harei ini, gam haong bruk cak rok patagok khang di Internet, mang rah ra, amuk Ma Ly hu taom gaik tuai damuai angaok dom blah internet. Gaok mai, amuk daok taduan mek harak ngak pandap tui hatai caong khin, thaik thaok di urang blei pandar ba tabiak, abih di nyu lac dom kuan mbang, resort bhian takre pandar ndap nda hu ngak tabiak meng tangin.

Amuk Ma Ly brei thau, anek kamei amuk taduan bruk ngak lac ba ndap nda lam am tagok angaok internet. Tuk hu tuai damuai caong khin blei, amuk meda mek tangin tame ngak tui thaik thaok ngan haong tanut yaom jien karei di gauk, meng dom pluh tal dom rituh ribau ndong, pambak tui yaok janih pandap, bingi hala atau baoh prong sit karei di gauk. Amuk Mai Ly klah rabha: “Urak ini dahlak akau jeng bhian pabak brei ndap nda lan am urang bangsa Churu ka dom kuan mbang prong, labik padeih padei di Nda Nang, Nda Lat, Mui Ne. Dahlak akau mboh biak bui sambai kayua lac meng kan diah ndap lan tok nao salih brah, salih padai, urak ini pablei hu tabiak langiu ye hu jien tame jien tabiak piah raong anek bik”.

Oh lac tok khik ramik bruk ngak lan am urang bangsa, amuk Ma Ly daok taduan raok tuai damuai, dom kapul nyaom mai rivang jirah iek saong tacei pato gilac, rivang iek ilamu ngak lan ka dom anek saih dalam saong langiu tinh, daong yaih khan, pambak prong bruk ngak lan meng tangin di urang Churu di puk palei.

Dalam masa tukvak 2019 - 2024, amuk Ma Ly hu UBND huyen Ndon Yuong klak alin brei Harak pok meyaom saong UBND tinh Lam Ndong klak alin brei Harak pok meyaom ka dom baoh jeng siam mekre dalam bruk pathau khan, pato tacei bruk ngak lan am ka bhap bani dom bangsa takik.

Bruk ngak lan nan lac sa bruk ngak meng kan lak lavik mai di bangsa urang Churu, hu tacei pato ba tui baoh sang. Jalan ngak tabiak lan hu tapa dom bruk ngak yau mek taneh haluk, jan taneh, harien taneh, tapat taneh piah ngak jeng pandap, ba pambu thu blaoh ka meng ba nao am cuh meng njuh. Ndap nda ngak tabiak mboh rilo nan lac dom janih ndap bhian pandar dalam sang yau gaok tahanek lisei, glah ngak aia bai, panjin huak lisei, glah riak aia… Yau nan min, tapa rilo thun bilan, bruk ngak lan am di urang bangsa Churu urak ini si mbuan lahik nao, tok daok takik mikva daok patui khik bruk ngak meng kan ini.

Tui ong Nguyễn Văn Tứ, Phaok akaok UBND xa Quang Lap, puk palei hu brei thau lac khik ramik bruk ngak meng kan di bhap bani bangsa takik nan lac sa dalam dom bruk ngak prong. Xa hu ba tabiak jalan ngak dalam bruk pasang iek quy hoach, parabha labik ka nyu lagaih piah grap tanat ndap nda piah ngak brei ka bruk ngak lan; meda samar drah peih ngak bruk yaih khan ndap nda, pambuak pagam duah labik pablei tabiak, buh jien ndo daong ka dom urang gheih tangin daok patui khik bruk ngak lan am meng kan di bangsa drei./.