Di palei Tọ Chuông, xa Búng Lao, tinh Dien Bien, adat mbang akaok padai bahrau di urang Khơ Mú (daok ieu lac Mạ Muôn Mạ Mệ) gam hu pamedeih saong peih ngak dalam bruk praong, siam gheih.

Tui urang bangsa Khmuk sahaneng, ini lac adat hu angan makna brei mboh salah sa mbang ngak hamu padai, lac tukvak piah urang brei mboh hatai thau dhar phol haong mukkei, langik ceik glai saong dom yang mebang sraong daong ka bilan ngak hamu padai hu siam.

 Banah adat hu srap gap tani tanat di yaok baoh sang. Kaya kan dalam adat piah duh paling yang dua hu dom janih ngak eng meng tangin rahra yau talo pabui, menuk, ndiuk, lisei bahrau, alak tapai riak eng, baoh kayau… Po sang ngak adat ieu da-a mukkei mai maong iek, bui sambai haong anek taco, likau prein yava, siam mekre salamat saong bilan ngak hamu yuak hu rilo dalam thun anak.

Hadei adat duh paling yang mabang dalam sang, kaya kan ngak adat hu ba tabiak akaok palei piah ngak adat ieu da-a po bhum, yang mebang, likau ka rahra manuac urang dalam palei ngak banah me-in pataom gauk bui sambai. Ini lac adat brei mboh hatai je tame yang mebang saong bruk hlai haong gauk di menuac urang saong langik ceik glai.

Tuk dom adat cambat yang mabang hu brei ngak salah blaoh, harei brei ngak mbang akaok padai mboh bui sambai jang, chreih chrai haong banah pataom gauk me-in ndung bak ilamo urang bangsa Khơ Mú. Sap caing, sap hagar sameng grauk ceik glai, hlai haong ragam tamia, kadha adaoh bhap bini dui pachreih bruk ba drei tame di rilo rahra dalam palei.

Taphia dom caih tapai, abih urang pataom gauk vil taom dar, klah rabha bui sambai hadei bilan yuak, brei ka gauk dom baoh panuac tadhau ayuh siam gheih ka thun bahrau. Harei Raya adat cambat oh sa janih hu makna gah yang mebang, blaoh daok hu lac harei piahka bhap bini pambuak pagam saong gauk, kak talei rohim kajap hatai anit ranam di rahra palei pala, pato ka rai rah sit thun umo ka adat cambat siam gheih di bangsa drei.

Dalam dalam rai diuk mbang ngui dak harei dak tagok, rilo yaom kaom ilamo bhap bini di dom bangsa takik dang anak bruk mbuan si lahik mbuan si kurang. Bruk pamedeih saong peih bruk mbang akaok padai bahrau di urang bangsa Khơ Mú, oh lac pabak hatai caong patao gauk me-in chreih chrai bui sambai di rahra blaoh daok daong khik ramik, patagok drap ar ilamo oh mboh di meta di bhum palei.

Tapa harei raya adat cambat, ilamo urang bangsa Khơ Mú hu pambak tabiak, jeng talei pambuak di meng kal dahlau saong jaman ini, di dom rairah dalam bhap bini. Gam haong nan, ini jeng lac sa kein lagaih hu makna piah bhum palei pandar ilamo siam gheih pagam haong patagok jirah rivang bhap bini, daong paglaong raidiuk daok dang saong hatai sahaneng di bhap bini bhum ceik glaong tinh Dien Bien.

Adat mbang akaok padai bahrau oh lac sa harei raya di urang bangsa Khơ Mú, blaoh nyu daok ieu lac bruk brei mboh siam gheih ka prein yava karo kajap di ilamo dom bangsa Viet Nam –dom ilamo siam gheih brei hu iek praong, khik ramik saong patagok dui suai dhua atah./.