Di palei Hưng Đăng xa Bù Đăng (di tinh Binh Phuoc klak), yaok tuk parang iek, kapul tamia hu jaik 20 urang hu rabha bruk di yaok labik, ngak jeng sa bruk yasa. Jaik abih dom ragam tamia jeng kayua urang bangsa Stieng neh tabiak saong dak padang tui adat cambat, raidiuk daok dang saong bruk ngak mbang yaok harei. Yaok ragam amia jeng hu dak padang biak tani tanat saong lagaih saong yaok bruk tantu di bangsa.

Sa-ai Điểu Ôn daok di palei Hưng Đăng hu pagam saong dom ragam tamia meng tuk daok ranaih jeng biak iek praong dom ilamo siam gheih hu mukkei caik mai. Sa-ai Điểu Ôn brei thau, taong abih dom ragam tamia heih karei hu mai meng raidiuk bhap bini yau ye, jah hareik, cakak padai, thaok brah… Tui sa-ai saong rahra di ini, bruk khik tani tanat kapul tamia lac tamia ka mikva dalam palei iek, jeng lac bruk piah rairah nao dahlau piah ngak kareih pasang saong brei apui ka anek taco harei hadei khik ramik taong abih ilamo siam gheih di urang bangsa Stieng oh palai lahik.

Tukvak blaoh tapa, prein diuk di ilamo urang bangsa Stieng di palei Hưng Đăng dalam nan hu bhum taneh Bù Đăng daok hu raong pabam meng bruk hadah krah oh padeih padei di bhap bini urang bangsa takik. Sa-ai kamei Điểu Thị Mưm brei thau: “Khol dahlak hulin tuk halei jeng khik ramik dom ragam tamia di bangsa drei. Maong rairah sit thun umo harei ini dak harei dak hu patui bruk, patagok dom bruk siam gheih nan khol dahlak biak uan tabuan. Dahlak hulin caong khin, bruk siam gheih di tamia, adaoh, taong kong caing di bangsa drei tuk halei jeng hu khik tapa dom rairah”.

Di palei Hưng Đăng, bhap bini urang bangsa Kinh saong dom bangsa takik karei jeng pambuak saong gauk, ngak lagaih yaok ragam tamia bhap bini bangsa. Dalam dom bingun raya, Tet atau dom harei adat praong, taong abih tamia saong gauk, ngak jeng sa thaik thaot ilamo rilo min yasa.

Oh padeih di bruk tamia dalam dom harei raya, mikva daok srap gap pandar kein lagaih di ilamo ngak kong saong mang xa hoi pambak tabiak dom thaik thaot siam gheih ini, ba ilamo Stieng nao tal ayut cuai sahabat dalam saong langiu tinh.

Amuk Nguyễn Thị Thắm, Akaok palei Hưng Đăng brei thau: “Kapul tamia Stieng hu ngak jeng saong khik tani tanat labaih 20 thun tapa. Khol dahlak hulin dak dak harei dak dui ba kapul tamia hu tani tanat, kham merat khik ramik ka hu dom bruk siam gheih abih yau bruk taong kong caing saong dom ragam tamia ta-eng dak padang gheih karei”. Amuk caong takre ba ilamo Stieng nao atah jang meng prein khang di ilamo ngak kong lek taka so.

Tapa dom danak dak adaoh tamia, kapul tamia pachreih dom urang ba tagok thaik thaot, video tagok Zalo, Facebook. Ini lac bruk labaih di abih piah ba ragam tamia, ilamo di urang bangsa nao tal grauk labik dalam taneh ia nagar, daong grauk urang hu thau anit ranam ilamo bangsa Stieng.

Ong Nguyễn Thanh Tùng, Phaok Bi thu Ndang uy, Akaok UB Bhap bini xa Bù Đăng brei thau, piah khik ramik ilamo bangsa, xa hu jao dom jabat, dom mbang saong pasak jitvu padang danak dak, jalan ngak patagok ilamo tukvak thun 2026-2030. Ong Tung ndom mayai lac: Taphia bruk khik ramik, xa daok hu jalan ngak ba dom kapul tamia nao tamia, peih harei raya karei di Bù Đăng pambak tabiak bruk siam gheih ini tabiak grauk negar. Daok di suai atah, jalan ngak hu makna lac pandar kein lagaih jirah rivang pagam saong ilamo bhap bini di bangsa Stieng saong brei ilamo siam gheih karo kajap ka bhum palei.

Urak ini, di bhum tinh Dong Nai, dom ragam tamia bhap bini di dom bangsa daok dang anak mbuan kurang lahik. Dom urang thau tani tanat ka seni nghe thuat bhap bini praong thun paje, dalam tuk nan kapul urang sit thun umo jeng daok takik. Dang di anak bruk nan, asal kadha khik ramik saong patagok drap ar tamia oh lac sa janih ta-eng di urang bangsa Stieng saong dom bangsa karei jeng bruk njauk ngak samar chip, brei ka hu sangka rilo jang meng dom pakat karja./.