Meda hu mboh yaok kapul dam dara daok la tapen gauk, ndom klao chreih chrai

  Thun ini, var darak “chợ tình” bahrau hu peih hadei di tuk jit ruak COVID-19 hu pacang veik, hu sap hagar, sap chiêng, thanh la chreih chrai nan ye meng tuk dah page, grauk dom canah jalan, urang taha, urang ranaih, likei, kumei dom bangsa Tày, Nùng, Dao daok dalam 8 xã taphia nan ba gauk mai darak. Tuk kreh jala pandiak darak hu rilo menuac di abih. Tuk ini jeng lac tuk rah tabiak bruk pablei salih bui sambai, chreih chrai. Meng dom candaih ahar palei hu mikva eng drei ngak yau ye bánh chưng, bánh dày, lisei lam tal dom kaya nong bhian randap piah ngak gia vị karei yau ye laya, kanyik, kruac aik…abih di nyu lac sa janih pandap mbang bhian randap abih di bhap bini dom bangsa daok di bhum glaong jeng hu ba tabiak pablei di pak ini, nan lac rabung glai.

Di labik daoh takơ, langiu dom kadha daoh Then, Sli, Cỏ lẩu… lai la-an, bingi pang tui panuac klak saong panuac bahrau di dom kalup kapul daoh tamia palei, daok hu mbaok tame daoh di rilo mikva nao darak, asal kadha di dom kadha daoh lac pok meyaom bruk meyut meyau, ndom ka palei negar, anek menuac palei Lạng, hatai anit ranam bruk ngak, dam dara anit ranam gauk.

Amuk Nông Thị Phượng, bangsa Nùng, urang daok pak nan brei thau: “Gheih mekre lac darak “chợ tình” hu dom gu, dom yau, dom kapul urang cang tal harei ini mai duah urang drei anit ranam dahlau daih piah taom gaok, ndom biai nao mai. Dahlau daih, kayua rilo makna oh mai haong gauk hu, oh jeng diuk jeng pasang hu, min urang jeng daok iek praong bruk anit ranam gauk saong yaok thun mai tal Háng Pò piah taom gaok gauk. Urang taom mbaok gauk tuk halei jeng bui sambai, chreih chrai, oh hu bruk ghen tuông, ganaong ganeh gauk”.

Ong Nguyễn Mạnh Tuấn, Chủ tịch UB bhap bini huyện Bình Gia brei thau: Thun ini, “Harei pataom tamia sư tử pakat huyện mbang camereip thun 2022” hu mbaok 14 kapul mai meng dom xã, ban sit dalam bhum saong rilo bruk me-in sambai, daoh tamia, thể thao meng kan ndung bak ilamu bangsa palei Lạng. Ini lac sa dalam dom bruk ngak di huyện piah jhul khang dom bruk khik ramik, patagok ragu daoh bhap bini, saong tapa nan ngak brei kajap jang talei jum pataom di bhap bini dom bangsa adei sa-ai daok dalam bhum. Rilo likei dam, kumei dara mai tal ini jeng hu ngak krein, ngak randap, pilih ruah urang ranam ka drei. Meda hu mboh dalam dom quán sit dalam darak di Pác Khuông, yaok kapul dam dara saong hu gam dom urang praong thun, daok la tapen gauk, ndom klao chreih chrai, tangi sua gauk ka prein yava, ka bruk ngak mbang ngak huak tapa dom cavan alak pahe bingi./.

Lang sap: Mousa Phương – 14/05