Danak dak hu rilo bruk chreih chrai yau ye yai pakacah nduac ghe xã Tân Hiệp mbang ka 4 di tatua pabah lamnge Bãi Làng;  Trại hè san hô di takai tasik Bãi Ông. Langiu di nan daok hu dom bruk yau ye parang iek thaot binguk ngô đồng bhong; Parang iek pandap panda saong ngak iek bruk pak yuin ngô đồng; Danak dak “Melam Cù Lao”; “Darak melam Cù Lao”; Mbang darak mayaih khan pambuak haong dom pandap palei di pabah lamnge du lịch Cù Lao Chàm.

Pandap pak yuin ngô đồng meng kan di rahra Cù Lao Chàm lac sa janih ilamo bhap bini, daong ngak brei mboh bruk  samar pandar kaya glai, piah lagaih haong labik tasik pulao di menuac sia daok pak ini. Bruk bhap bini thau mek pandar pandap piah yuin meng ngô đồng lac jalan praong piah khik veik bruk ngak meng kan ini pak Cù Lao Chàm, khikramik khang kajap inem krung ilamo di rai dahlau caik veik.

Bilan 2/2024, Mintri Ilamo, Thể thao saong Du lịch brei ba bruk pak yuin ngô đồng di xã Tân Hiệp, ban Hội An tame Angan Inem krung ilamo oh maong mboh di mata pakat Negar.

Tui panuac di rilo urang praong thun daok di angaok pulao, bruk pak yuin meng phun ngô đồng hu meng lavik mai oh thei thau urang ngak tabiak bruk ini lac thei, min tal urak ini, bruk ini jeng daok saong hu pato veik ka rai ranaih.

Yuin ngô đồng Cù Lao Chàm hu rilo menuac maong lac baoh yuin hu ngak biak kan, ngak meng tangin biak gheih, abih rilo tukvak saong prein yava, tari tareng, kham marat di urang pak, meng caga pandap, yaok talei yuin saong prein yava piah ngak tabiak sa pandap biak gheih mekre. Pandap piah ngak tabiak yuin lac kanduh phun ngô đồng, phun ini tok tamuh di mangaok ceik glaong atau di plah patau kan nao mai. Yaom lac langik hajan ribuk, gha phun jeng tamuh kajap tame patau saong dhar phun tuk halei jeng khang kajap saong atah tabiak yau brei thau lac oh huac kan kandah di langik tasik.

Meng bilan 4 tal bilan 7 lac bilan phun ngô đồng hu bingu rak tabiak. Ini jeng lac tuk piah ka rahra daok di angaok pulao nao pilih ruah kanduh dom phun ngô đồng piah pak yuin. Kanduh phun ngô đồng pandar ngak yuin lac phun tapak meng ngak tabiak talei tapak, lamar, nyuak saong kajap. Rahra daok pak ini brei thau lac phun ngô đồng tamuh tabiak eng kayua asal baoh taha laik trun haluk blaoh tamuh jeng phun. Pandar kanduh phun piah pak yuin lac siam di abih, nan ye rahra bhian pilih ruah dom phun praong labaih 20 - 30cm saong bán kính meng 3 - 5cm.

Hadei di tuk kaoh phun, njauk jan phun meng sa talok patau praong piah mek kanduh. Mek sa tangin khik sa akaok saong tangin daih yar tagok glaong saong jar tame patau  tal tuk halei kanduh talah tabiak. Ngak yau nan meng 2 tal 3 mbang, hadei di nan mek takai khik veik saong taoh mek kanduh meng mangaok trun. Talei phun ngô đồng dahlau di tuk ngak yuin hu tram saong rao hacih meng xabon. Bruk ngak hu makna abih lac pambu pandiak ka thu, blaoh kak veik jeng paok sit piah pandar thu tuk pak yuin.

Pak yuin ngô đồng kan jang dut saong bruk sak halam, atau pak canaih, jangoa. Caong khin pak yuin dahlau di abih brei thau ilamo jhik talei, urang pak njauk caik hatai kak talei blaoh pak jeng rilo nút. Yuin ngô đồng biak kajap, pandar hu 15 - 20 thun saong biak bingi rup tuk ndih mangaok. Tuai blei yuin ngô đồng oh lac kayua hatai caong pandar bo daok lac piah duah thau adat cambat, ilamo di bhum taneh Cù Lao Chàm./.