Tui ilamu meng kan mai di urang Mnông, adat ieu yang likau prein yava ka lamen hu peih ngak tuk salah abih bilan pala drak saong dom kadha praong dalam thun. Tuk nan, lamen hu menei ia hacih sa-at, hu brei mbang dom kaya mbang bingi, hu brei padeih padei saong ngak adat ieu yang likau prein yava. Dahlau deih, pandap ngak adat ieu yang bhian lac sa drei pabui saong dom ché alak tapai atau tui jien padai hu takik atau rilo di po sang. Min urak ini, dalam yaok dua, klau thun, xã hu peih bruk ngak adat ieu yang likau prein yava ka taong abih dom drei lamen dalam xã sa mbang haong gauk. Ong Y Ril Knul (aê Tạo), taha palei Ea Mar, xã Krông Na brei thau: “Pandap piah ieu yang hu brah, lisei, din, hala, pakao caik angaok papan ngak adat, gam haong nan lac alak cần, drei pabui praong 30kg. Drei pabui hu sik ngak ralow blaoh mek darah caik tagok papan kakuh, hadei di nan mek darah ini saong dom pandap ieu yang karei karei caik tagok akaok lamen piah brei mboh hatai anit ranam di po sang brei ka lamen, brei ka lamen thau hu lac nyu daok hu po sang ngak adat tadhau ayuh prein yava.”

Adat ieu yang likau prein yava ka lamen hu ngak haong 3 mbang cúng lac cúng muk kei, cúng tadhau ayuh prein yava ka lamen saong cúng thau dhar phor dom po yang. Hadei di yaok mbang cúng, sap chiêng hu yava tagok chreih chrai, dom dam dara pan tangin gauk tamnia xoang saong abih gauk tame menyum alak cần di dom ché. Hadei di nan, gru ieu yang yam takai tal, gam cúng gam puac panuac likau ka lamen tuk halei jeng hu prein yava khang kadang, daong ka sang, ka puk palei dalam dom bruk praong, gam haong nan lac cuk kaong ban ka urang glang iek lamen. Salah adat ieu yang, urang taong veik chiêng, menyum alak tapai saong ba drei tame bui sambai. Ini lac tuk piah ka abih gauk hu daok jaik gauk jang, jum pataom gauk saong ndom biai nao mai haong gauk rilo jang, saong tapa nan piah khik ramik ilamu siam mekre meng kan mai di bangsa. Sa-ai Y Com H wing (ama Nháo), akaok kapul kong chiêng xã Krông Na khan lac: “Drei jeng rik prein tame piah ba bui sambai ka mikva dalam puk palei di drei. Mboh ngak yau nan jeng biak uan tabuan, mboh mikva ngak hu yau harei ini jeng biak bui sambai. Jeng thau dhar phor xã di drei hu padang ngak ka mikva puk palei drei hu khik ramik saonng cakrok di harei hadei.”

Dom thun jaik di ini, dom tapon lamen sang di Đắk Lắk dak harei dak takik nao. Karja saong gah chức năng daok kham merat piah khik ramik saong iek glang tapon lamen daok hu. Meng bruk ravang iek siam haong lamen hu sangka rilo jang, ye bruk peih ngak dom adat cambat meng kan pambuak pagam haong lamen hu peih tabiak jalan nao bahrau piah cakrok patagok bruk ravang me-in haong lamen. Ong Y Tê Bkrông, daok di buôn Drang Phôk, xã Krông Na caong lac, dom adat cambat yau nan hu ngak gam gam saong jeng bruk ilamu hadah krah, jeng labik ravang iek, labik du lịch di puk palei. “Raidiuk cakrok bo caik lahik nao ilamu ini, dahlak mboh biak suh sah. Kayua lac daok khik ramik hu meng hu yaom. Abih di nyu lac khik veik ilamu meng kan ini, di xã Krông Na hu Pasak du lịch meda daong ka rahra hu khik ramik bruk ini saong hu bruk ngak piah duah jien, tuk tuai mai tal ini.”

Langiu di ilamu gheih mekre, adat ieu yang likau prein yava ka lamen daok brei mboh bruk anit ranam, iek praong lamen, tapa nan yau kakei, yau pahadar abih menuac sia, ba gauk sangka, khik caga tapon lamen sang./.