Adat Then Kin Pang lac adat ghieh mekre di bangsa Thái putih daok di Lai Châu

  Bhap bini Thái daok di Tây Bắc saneng lac Mường trời hu dom po yang khik iek. Anek manuac ala dunya tui bruk di po langik saong dom po yang. Menuac di po langik, tapa urang lambaok lac Then meda trun dunya taom gaok menuac sia di puk palei, ba brei hajan siam, hangin lagaih, pala hagait hu nan, puk palei siam mekre, salamat.Then jeng lac menuac lambaok ka urang daok mala dunya brei thau hatai saneng, caong khin di menuac sia haong po langik saong dom poyang.

Piah pahadar saong thau dhar phol prein yava di Then, yaok thun tal bilan 3 saka ia bulan, urang Thái putih daok di huyện Phong Thổ, Lai Châu ba gauk peih ngak adat uan Then, daa Then trun dunya bui sambai haong puk palei, hu ieu lac Then Kin Pang.

Dalam 3 harei peih tabiak di adat Then Kin Pang hu rilo bruk ngak ndung bak ilamo di urang Thái putih ngan haong dom kadha main meng kan saong dom janih thể thao yau ye: Ném còn, cuh haning, pacang meta taong ginang, jhul gai, parang iek khan aw, daoh tamia, pacacah ngak pandap mbang…

Dalam harei praong di bruk ngak adat, ngan haong kadha praong lac ngak adat ieu yang di sang Then. Di pak ini, amuk Then ngak adat likau ka bhap bini tuk halei jeng hu prein yava khang kadang, trer sil, haniem phul, likau ka hajan siam, hangin lagaih, sa thun hu patuah jamo, raidiuk siam mekre salamat, baoh sang haniem phul.

Urak ini, yaom lac raidiuk hu rilo salih bahrau, min bruk ngak adat jeng daok hu urang Thái daok di Phong Thổ, Lai Châu peih ngak yaok thun, piah khik ramik ilamo bangsa, pato pakai anek taco, mboh hadah mbaok meta ka halau gha di bangsa drei.

Adat Then Kin Pang lac ilamo hadah krah, lac bruk daoh tamia meng kan gheih makre hu pagap yau suan yava di urang Thái daok di Phong Thổ. Adat jeng piah rik daong tame bruk khik ramik ilamo siam mekre di dom bangsa pagam haong cak rok patagok du lịch di tỉnh.

Tapa dom bruk ngak di adat jeng piah pathau khan saong patagok hatai anit ranam taneh ia, hatai hadah mbaok meta ka bangsa, hatai thau khik ramik dom ilamo meng kan, pakhang bruk jum pataom bangsa. Gam haong nan, yaih khan, paok mayaom dom yaom glaong ilamo siam ghieh di bangsa Thái huyện Phong Thổ tal rahra di dalam taneh ia saong angaok dunya./.

Urang lang: Thu Thao – 07/05