Phleing Ngũ âm meng kan di urang Khmer (Pinn Peat) lac sa dàn nhạc, mai meng 5 bộ alat ragam, hu ngak meng 5 janih karei di gauk ngak jeng 5 sap karei di gauk, lac: paok ban, paok lisei, paok kayau, paok yuk saong paok kalik. Yaok janih alat ragam hu ngak jeng sap biak cambaih laih, khik bruk hòa âm ka abih dàn nhạc piah tuk hòa tấu ngak tabiak sap biak bingi pang, meng biak bier tal glaong di abih, meng lai la-an tal khang kadang nao tame hatai manuac.

Tui Thượng tọa Tăng Sa Vông, lac po paha Khmer di xã Hưng Hội, huyện Vĩnh Lợi, tỉnh Bạc Liêu: Urang Khmer hu sa gilang alat ragam biak rilo janih gheih mekre. Di dom paha di urang Khmer di xã Hưng Hội, yaok paha jeng hu takik di nyu sa kapul phleing ngũ âm.

Phleing ngũ âm lac ragu ragam meng kan hu angan je di urang Khmer Nam bộ. Nyu hu sap yava khang saong bhian hu pandar dalam dom adat cabat hu makna praong di dom paha Khmer saong dalam dom harei rija roya meng kan. Phleing ngũ âm hu ngak biak gheih, mekre, yaok janih alat ragam hu ngak jeng sap biak cambaih laih, khik kajap bruk hòa âm ka abih dom phleing.

Tui dom urang takre saong duah thau ka phleing ngũ âm, ini lac phleing hu ngak biak gheih, mekre. Tuk parang ma-in, urang ma-in bhian neh tabiak tui yaok alat ragam piah độc tấu, piah patagok glaong di abih bruk gheih mekre dalam sap yava di yaok alat ragam, jang yau prein parang ma-in di yaok urang ma-in.

Di dom harei lễ, Tết meng kan di urang bangsa Khmer jang yau di urang Kinh, rilo paha Khmer di bhum taneran kraong Cửu Long jeng yau di Bạc Liêu bhian peih dom harei pataom me-in, atau parang ma-in phleing ngũ âm.

Abih di nyu nan lac, dom asal kadha praong yau ye pok meyaom Đảng, Wa Ho, pok meyaom bruk jum pataom di rahra 3 bangsa Kinh – Khmer – Hoa dalam bruk dak padang saong khik caga taneh ia, ka tasik pulao di taneh ia, bruk dak padang saong cak rok patagok di bhum taneh gah maraong, di dom tinh, ban dalam bhum…

Urak ini, phleing ngũ âm hu jeng kadha ma-in oh kurang hu dalam dom phum, sóc di mikva bangsa Khmer. Tuk phleing ngũ âm yava tagok, meng urang taha tal urang ranah, meng likei tal kumei jeng chreih chrai chat tamia, ba drei tame kapul tamia, ba mai bui sambai, chreih chrai jang.

Piah khik ramik saong patagok dom ilamo meng kan, gheih mekre di mikva Khmer, rilo thun tapa tỉnh Bạc Liêu saong dom tinh dalam bhum taneran kraong Cửu Long hu rilo mbang peih Harei pataom phleing ngũ âm saong tamia bhap bini Khmer dui pachreih hu rilo kapul mai meng dom paha Khmer dalam saong langiu  tinh dalam bhum hu mbaok tame.

Yam ndok Sở Ilamo, Brei thau, Thể thao saong Du lịch Bạc Liêu Trần Thị Lan Phương ndom lac: “Kanja saong dom gah chức năng di tỉnh tuk halei jeng sangka tal phleing ngũ âm saong tamia bhap bini di urang Khmer di pak ini. Piah khik ramik yaom glaong ilamo meng kan di dom bangsa takik di dalam tỉnh; yaih khan ka prein khang cak rok patagok ilamo, the thao, du lịch saong dom yaom glaong inem krung ilamo di dom bangsa takik tỉnh Bạc Liêu dalam bruk salih bahrau, mbeik drei tame dunya”.