Dalam gilang ilamu bhap bini di urang Ca Dong, dom ragu daoh bhap bini meng kan tuk halei jeng lai la-an, bingi pang, gam sahneng duah bahrau, gam brei mboh hatung hatai anit ranam. Dom ragu daoh bhap bini yau: Ra nghế, ca lêu, plét, a hội, dê ôdê, tal ragu k’cheo meng kan tabiak rai dalam tuk ngak bruk saong dalam raidiuk yaok harei brei mboh hatung hatai di urang Ca Dong, caong khin langik siam hajan lagaih, ngak hamu hu padai ngak apuh hu tangei brei ka bhap bini hu trei sir, diuk rai pambuak saong langik tasik, ceik glai. Ini lac sa dalam dom ilamu siam gheih hu urang Ca Dong  khik ramik saong patagok. Mikva  bhian daoh tuk tagok apuh, daoh dalam dom harei peih ngak adat sik kubao, Tết, ndam lakhah, ma-in sambai, daoh tuk dai yuan ka anek ndih, dom dam dara puac that meyut meyau haong gauk jeng yau daoh tagok dalam ceik glai ram rasa rasa.

Meng kan mai, urang Ca Dong daoh k’cheo piah brei thau hatung hatai di drei, caong khin langik siam hajan lagaih, ngak hamu ngak apuh pala drak hu siam tamuh hijao brei rilo padai brah piah bhap bini pambuak pagam haong langik tasik. Gam haong nan, urang bhian daoh ragu raghế  piah khan ka thaot binguk  prein yawa kubao daong urang Ca Dong ngak bruk pala drak saong dahlau tuk sik kubao paling tagok yang mebang. Ini lac jalan diuk rai ndung bak hatai anit ranam, nan jeng lac panuac likau ma-ah di bhap bini dahlau di tuk palao kubao nao a lot diah haong yang mebang.

Meyah ragu daoh raghế lac dom panuac daoh brei thau hatung hatai tui jalan ndem meyai nao mai, ye ragu daoh a hội di urang Ca Dong  lac daoh dam dara. Di dom biar harei sup, ia harei jaik tame ceik atau dalam dom melam ia bulan hadah, jeng lac tuk  likei dam Ca Dong taong chieng h’len tagok tuk samar tuk glong yau sap yawa ceik glai ginreih, tuk jangaih, hanjol  yau ia craoh nduac róc rách. Likei dam saong kumei dara tame daoh ahội haong gauk.

Meng sap daoh khang kadang, tuk biar, tuk glong,  tuk druat druai ieu da-a, urang kumei anit ranam urang likei, oh padauk dalam hatai hu nan ye pok sap daoh payua di glai ram ceik glong.  Blaoh meng harei nan, urang likei dam saong kumei dara nan khan brei maik ame di drei thau lac duah hu urang anit dalam hatai drei ye. Meng harei paguh, dua urang nan hu nao mai di dua baoh sang piah daong ngak apuh, pala tangei, tam padai, nao man athur oh njauk bruk pakauk di mikva dalam palei. 

Karei jang ragu daoh ahội, piah brei thau hatai anit ranam di urang kumei Ca Dong tuk mai ngak metau di palei karei, ye urang daoh ragu ca dê ôdê ví von biak gheih pang. Dê ôdê lac ragu daoh biak katut panak min biak gheih, meda daoh sa urang,  jeng yau daoh nao mai rilo urang meyaom dom siam gheih di ceik glai, anek manuac  Ca Dong bhum ceik glai Trà My.

Meyah ragu daoh bhap bini dê ôdê bui sambai ye ragu daoh plét biak gheih min brei daoh njuak bruk njauk tuk di nyu. Njauk tuk kayua kadha hagait nan urang kumei Ca Dong nyim thaik thaot ragu daoh plét biak gheih piah brei thau hatai di drei. Blaoh thaik thaot nan, urak ini hu jeng ilamu siam gheih dalam raidiuk bhap bini Ca Dong hu patoa veik meng rai ini tapa rai diah, hu bhap bini iek praong saong khik ramik./.

Urang lang: Ai Nghiem – 27/8/2022