Palei Hoài Khao dalam ban sit Nguyên Bình tok hu 35 sang haong 169 urang daok ta-eng dalam sa thung lũng, pacang vil val meng dom baoh ceik glaong biar bak sambo màu hijao. Saong bruk ngak ka urang halei mai tal palei sit ini oh var hu nan lac dom blah khan ao biak mekre meta meng dom bingu la hu cih meng sáp ong.

Sa-ai kumei Bàn Thị Liên – urang dang akaok kapul pek in bingu la meng sáp ong di palei khan lac, brei hu yot caik bau, ging am, jam pasei piah riak pandiak sáp ong, dom khuôn kreim, la-a piah ngak jeng bingu la angaok khan bai… Saong dahlau di abih lac brei ngak biak tani tanat piah hu dom candaih sáp ong kanyik katam jangaih: “Sáp ong ini drei khik ramik kayua urang Dao Tiền saman dahlau meng tuk tani tanat labik daok, labik ngak mbang, ngak tabiak dom blah khan ao ini hu pandar sáp ong piah in tabiak dom blah khan ka urang kamei Dao Tiền cuk. Dom labik sruh hon ini hu bhap bini khik pacang, yaok thun tal bilan ye bhap bini nao pok likau, menuac rik menuk, menuac daong ba-ar piah mek sáp, ta-a gru mo nao pok likau. Yaok thun tal bilan thu hon nyu par nao, tal bilan bingu nyu par mai ngak sruh.”

Tui panuac khan di sa-ai Liên, yaok kg sáp ong meda in bingu hu ka meng 8-10 blah khan. Jalan piah ngak hu 1 khan ao hu bingu in meng sáp ong lac oh mbuan, meng dui khan tanyiak ka nyu tapak saong jangaih, parabha blah tanyiak khan jeng rilo ô, cột. Hadei di nan, sáp ong hu riak ralai piah cih bingu. Hadei di tuk cih blaoh, khan bai hu nhuộm chàm meng 20-30 harei mbiah tal tuk tagok sambo gheih mekre. Tui nan, piah hu sa blah khan ao siam, mekre, abih tal labaih 1 bilan.

Meng dom blah khan bai in bingu sáp ong piah jhik khan ao, urak ini, urang kamei Dao Tiền palei Hoài Khao sahneng duah, ngak tabiak rilo janih pandap piah pandar yaok harei yau ye khan, kadung bak... Dom pandap bingu la ini hu ba nao yaih khan di rilo labik, yau ye Miuyim Urang kamei Việt Nam di Hà Nội atau “Harei pataom kraong ceik Cao Bằng” di palei Ilamu - Du lịch dom bangsa Việt Nam…

Piah ngak ka angan bingu sáp ong di urang Dao Tiền saong palei du lịch Hoài Khao pambak tabiak praong jang tal tuai damuai dalam taneh ia saong langiu dunya, ong Hoàng Quốc Chấn - akaok UBND xã Quang Thành brei thau: “Anak tal kham merat piah mikva ngak tabiak dom janih pandap lưu niệm yau ye khăn, patal… piah ka tuai thau saong blei pandar dom pandap kayua mikva Dao Tiền ngak tabiak. Tukvak tapa, kol dahlak pambuak gauk peih dom tal pato menyim tanyiak, khan bai, pet, mbaoh bingu meng sáp ong angaok khan ao di urang Dao Tiền brei ka dom adei sa-ai kumei dalam palei saong dom puk palei jaik taphia piah khik ramik saong ngak tabiak dom pandap meng tangin”.

Urak ini, tuai mai tal Hoài Khao daok tagok rilo jang tapa yaok thun, haong chất lượng dịch vụ hu paglaong tagok. Tui nan jeng hu makna lac, raidiuk mikva daok hu siam jang, ilamu mbaoh bingu meng sáp ong jeng hu jalan khik ramik siam jang.

Yau dom baoh bingu gheih mekre oh tuk halei par lahik, meda lac ilamu mbaoh bingu meng sap ong angaok khan bai tuk halei jeng nao tui adei sa-ai kumei Dao Tiền palei Hoài Khao./.