Meng kan dahlau, daok dalam dom labik glai sup palup, rilo athur glai, baoh sang atah hu daong ka dom urang dalam sang daok jaik taphia gauk, ba gauk pateok athur glai mai palei palai pajoa. Dom paga pacang vil val sang atah, langiu di bruk brei thau quyen ngak bo, daok lac piah pacang athur glai tame, pacang kol kanjak jhak.

Mayah urang Ba Na, urang Jrai atau urang Cơ Tu hu sa baoh sang praong piah ka dom urang dalam palei daok haong gauk, ye urang M’nông daok di bon Pi Nao tok hu sang atah. Yaok baoh sang atah lac sa palei. Hu taha palei gam daok dalam baoh sang nan, khik iek dom baoh sang.

Dom baoh sang di puk Pi Nao tauk hareik jaik tal haluk. Tabung sang khum khum di mangaok akaok. Pabah mbang tame biak sit, pabah mbang sit di akaok sang gah likuk hu tabung mblo tabiak. Tabung sang pacang abih baoh sang, hangin glai oh tame hu gah dalam, khik pandiak ka taong abih manuac dalam sang dalam dom harei hangin la-an. Nan jeng lac makna bo baoh sang di puk Pi Nao lac biak karei jang rilo labik.

Rah tapa rilo rai, urang M’nông sahneng duah, ngak tabiak hu sa labik daok pacang hu langik tasik kan kandah di bhum taneh ini. Saong piah ngak hu baoh sang atah nan, jeng brei hu ilamo.

Saai Y Lanh urang M’nông daok di puk Pi Nao brei thau: “Mek kayau ngak sang lac bruk biak praong. Drei tok mek phun dang tapak, phun nan daok kajap, daok khang. Kayua baoh sang jeng brei mboh bruk diukrai sron mbon, siam makre. Phun tapak, phun khang meng cak rok patagok hu”.

Daok tui ong Điểu Sơn daok di xã Quảng Tiến, huyện Đắk R’lấp, njauk maong iek ia bilan piah pilih phun ngak sang. Tok kaoh phun tuk melam ia bulan bak baoh, ia bilan sup kaoh phun meda hu maok, ngak sang oh hu. Kaoh oh njauk bilan, sang ngak dalam 2 tal 3 thun drei njauk ngak veik. Daok oh ngak veik, drei tok daok hu 10 tal 20 thun min.

Tui urang M’nông, bruk pilih hala tauk sang jeng lac bruk biak praong. Mayah thau duah hala cọ, hala tang, hu ilamo tauk tabung, baoh sang nan meda khik hu suai lavik. Cakak tang blaoh caik dalam 2 - 3 harei ngak hacih. Hadei di nan ba paok mai sang. Phun lồ ô kaoh jeng dua, blaoh ba tram ia plaih maok mbang, hadei di nan ba nao pak. Saong puac abih lac ba nao tauk tabung sang.

Tabung tang rah tapa hadom pandiak hajan, dak harei dak hu pabak tal thak pui gam tame ngak brei kajap jang. Dom rai rah anek taco dalam sang atah nan patui veik ilamo siam gheih di ong muk amaik ame, khik suan yava di bangsa. Tuk baoh sang hu ngak salah, dom urang dalam sang meda gam klah raba bui sambai tal taong abih dom palei. Jang yau thau dhar phol po yang hu pacang khik piah ka bruk ngak sang hu siam mekre.

Urang M’nông hu adat cambat kakuh rilo yang, urang jia lac yaok phun kayau, abih janih jeng hu suan yava saong kraong, ribaong, ceik, langik, taneh ini jeng hu po khik iek, daong ba ka raidiuk hu trei sil. Saong ginreih di abih lac yang glai.

Yaok palei urang M’nông hu sa glai gireih. Dalam glai gireih nan rahra kakuh yang glai. Urang halei jeng oh hu gaoh tame glai, meng bruk kaoh mek phun, cap cim, man pateok athur… Dalam bilan padai tasak, hadei di tuk yuak blaoh, di bilan 2, urang M’nông ngak adat ieu yang glai, piah thau dhar phol sa thun ngak mbang hu mbuan lagaih. Tapa nan, mikva ngak gam bruk ieu yang padai bahrau. Glai lac kaya pandap hu yaom biak glaong di urang M’nông. Lahik glai lac lahik halau gha, ilamo. Kayua yau nan ye, dom rai urang M’nông jeng daok khik ramik kaya pandap hu yaom glaong nan di muk kei, ong kaok ong kar caik veik./.