Dalam dom mbang pataom mbaok di dom urang taha, urang likei Hrê jeng mek chiêng tabiak taih

Mikva bangsa Hrê hu rilo ragu daoh bhap bini biak gheih, ndung bak ilamo di bangsa drei. Sa dalam dom urang abih hatai khik ramik dom ilamo di bangsa Hrê daok di gah Tây Quảng Ngãi lac ong Phạm Văn Sây, xã Ba Thành, huyện Ba Tơ. Meng hatai anit ranam saong takre ragu daoh bhap bini di bangsa drei, meng sit, ong Sây eng drei duah bac magru dom ragu daoh Ka choi, Ta lêu meng amaik saong amuk. Ngan haong ong Sây, ragu daoh bhap bini di bangsa Hrê lac gilang ilamo hu yaom biak glaong, lac janih oh kurang hu, njauk khik ramik.

Ndem tal ilamo di bangsa Hrê lac ndem tal dom alat ragam meng kan, yau ye: cồng chiêng, capi Brook, chinh K’la, Ta lía, khèn Ra ngói, hagar. Dalam nan, cồng chiêng lac alat ragam kak kajap haong raidiuk di bhap bini, lac sap ndem meng hatung hatian di anek menuac, piah brei mboh bruk bui sambai atau duh hatai. Dalam dom mbang pataom mbaok di dom urang taha, urang likei Hrê jeng mek chiêng tabiak taih. Kayua sap chiêng lac biak hu yaom glaong saong jaik taphia haong mikva nan ye hu rilo rai urang Hrê khik ramik saong jeng ilamo siam makre.

Ong Đinh Văn Bôn, xã Sơn Trung, huyện Sơn Hà hu sa “miuyim sit” ngan haong labaih 100 pandap lac dom janih chiêng, alat ragam, pandap panda meng kan di urang Hrê. Yaok janih pandap lac sa dalikan ilamo, lac suan yava di bangsa hu khik ramik veik. Ong Bôn duah pataom, khik piah dom janih alat ragam, pandap panda meng kan di bangsa Hrê ngan haong hatai caong ngak brei pachreih, daong ka rai ranaih hu hatai takre, meng nan thau khik ramik ilamo di bangsa.

Bruk manyim khan bai di palei Teng, xã Ba Thành, huyện Ba Tơ jeng lac sa ilamo biak gheih di bhap bini Hrê. Dom bingu la mangaok dom blah khan bai hu brei mboh dom siam gheih, dom adat cambat, bruk tari tareng di urang kumei Hrê. Di palei Teng urak ini, sang ilamo palei lac labik daong ka bhap bini khik ramik saong patagok dom yaom glaong ilamo meng kan di bangsa, paglaong ilamu, hatai sahneng di bhap bini.

Piah khik ramik, patagok ilamo di bangsa Hrê, Pasak khik ramik ilamo Hrê hu padang ngak di mangaok mblang taneh praong 25 ha di huyện Sơn Hà tui jalan padang ngak meng kan piah pasiam veik palei ngak meng kan; duah pataom dom alat ragam, pandap panda dalam bruk ngak mbang, pala drak, dom pandap pandar yaok harei; iek praong bruk patoa veik, pamadeih hatai anit ranam ilamo bangsa drei ka rai ranaih bangsa Hrê… Ong Nguyễn Tiến Dũng, Yam ndok Sở Ilamo, Thể thao saong Du lịch tỉnh Quảng Ngãi brei thau: Tukvak anak tal, gah Ilamo daok brei peih dom tal pato ragu daoh bhap bini, ragam tamia di dom huyện; gam peih dom harei pataom pacacah, parang main, harei pataom ilamo ndung mbak ilamo di bangsa Hrê./.

Urang lang: Thu Thao – 13/08