Bilan 3 thun 2022, di mbang parang iek EXPO 2020 peih tabiak di Dubai, Dom Tiểu vương quốc Ả Rập Thống nhất, kapol  Việt Nam hu ba tame parang iek rilo bruk ngak ilamu, dalam nan hu show angui cuh khan ao meng khan bai bangsa ngan saong kadha “ Jalan nduac miat miat” hu kandaong veik dalam hatai urang mong iek. Khan bai Palei Teng hadah mbaok meta hu tame dalam angan 5 janih pandap dalam bộ duah pataom di dom urang thiết kế danei angan. Nan lac  dom blah khan ao birau hu jhik meng khan bai bangsa gam haong dom bingu la biak gheih mekre, hu ngak meng tangin gheih ngak di anai dara bangsa  H’rê Phạm Thị Y Hòa daok di Palei Teng, xã Ba Thành, huyện Ba Tơ, tỉnh Quảng Ngãi.

  “ Mbang akaok meti khan bai bangsa H’rê, khan bai Palei Teng hu ba tabiak dunya, ngan haong dahlak nan lac sa bruk biak patuah jamo tuk bo pandap drei ngak tabiak hu urang jia tame blaoh ba tabiak negar langiu parang iek di dom show angui cuh khan ao peih ngak dalam praong prang di dom urang thiết kế. Ini lac bruk biak lagaih ka khan bai Palei Teng, khan bai bangsa  H’rê.”

Bruk menyim khan bai meng kan di Palei Teng hu urang bangsa H’rê khik ramik, patoa veik tapa rilo rai rah. Yaok thun tal bilan 3, tuk phun kapah raak tabiak, urang kumei H’rê gui yot tagok apuh paik kapah, ba mai pambu thu. Tapa rilo bruk ngak, kapah hu dui jeng merai, nyom sambo mau saong menyim meng tangin. Dahlau diah, dom blah khan bai hu mikva dalam palei ba tabiak pablei di darak. Urak ini, di Palei Teng, rilo dam dara H’rê sami samar hadah krah jang, yaih khan pandap angaok mạng xa hoi, meng nan khan bai Palei Teng  hu urang blei grauk labik thau tal. Khan bai Palei Teng urak ini hu dom urang thời trang pandar piah ngak dom blah khan ao, ba tagok yaih khan praong dalam ka bhap bini thau.

Thun 2019, bruk menyim khan bai meng kan di urang bangsa H'rê, daok di Palei Teng, xã Ba Thành, huyện Ba Tơ, tỉnh Quảng Ngãi hu Mentri Ilamu, Thể thao saong Du lịch poki angan lac Inem krung Ilamu phi vật thể Pakat negar. Thun 2021, HTX dịch vụ ngak nong - ngak glai- Dulich- Ilamu Palei Teng tabiak rai saong hu 19 urang, ralo meng lac dom dam dara H’rê. Muk Huỳnh Thị Phương Hoa, Phaok Yam ndoc Sở Ilamu, The thao saong Dulich tỉnh Quảng Ngãi brei thau, di bhum ceik Quảng Ngãi dak harei dak hu rilo dam dara bangsa H’rê, Cor, Cadong…kham merat patagok dom yaom glaong ilamu meng kan di bangsa:

  “Bruk khik ramik saong patagok dom yaom glaong ilamu di bangsa oh lac bruk njauk ngak, bruk ba tangin tame di sa pakat, sa gah bo brei hu bruk abih hatung hatai, brei hu daom sarak ưu tiên saong daong di tanut glaong abih di rilo gah, rilo pakat. Abih di nyu nan lac bruk pachreih pablei salih, marketing piah dom pandap hu ilamu ini hu labik pablei. Meng nan, paglong kein laba ka bruk ngak tabiak dom pandap ilamu meng kan, ngak jeng prein khang pachreih dom rai rah dam dara  hu mbaok tame khik ramik saong patagok dom yaom glaong ilamu bangsa./.”

Urang lang: AI NGHIEM -26/3/2022