Daok yam takai nao angaok jalan haluk sit dalam Bein Negar Yok Đôn, labik xa Krông Na, huyen Buôn Đôn, tỉnh Đắk Lắk, lamen binai H’Blú mboh dom pandap mbang ye samar drah brei ka dom drei lamen karei thau. Tui likuk lamen H’Blú, lamen binai Khăm Phanh jeng samar drah yam nao gah anak piah mbang dom phun patei hu kaoh caik dahlau. Tuk mbang blaoh, kol nyu yam nao gah takai kraong menyum ia, menei ia piah tuai damuai maong iek.

Yaok bruk ngak di 2 drei lamen jeng rahtabiak tui hatai di nyu, oh njauk kateik greik atau tui tacei pato di urang glang iek. Tuai  ravang me-in dang di atah piah khik salamat, tui iek bruk daok dang nao mai di lamen saong pang urang tacei ba yaih khan ka bruk di nyu, brei thau bruk pato pasram lamen, bruk glang iek di yaok drei lamen. Sa-ai Phan Ngọc Quế Lâm, tuai daok di TPHCM khan lac: 

 “Mboh yau lamen daok dalam glai, kol nyu mboh chreih chrai ye dahlak jeng chreih chrai tuk mboh hu bruk yau nan. Lamen lac sa janih athur glai bo hu daok dalam glai ye mboh siam mekre jang. Hu sa-ai tacei ba brei thau rilo kadha ka lamen biak chreih chrai saong caong khin lac drei hu thau rilo jang ka kol nyu".

Bruk ini lac tour ravang me-in sinh thai siam mekre haong lamen kayua Bein Negar Yok Đôn saong Kapul athur châu Á pambuak gauk peih ngak meng kreh thun 2018. Haong jalan ngak lac khik caga tapol lamen di Đắk Lắk anak bruk dom drei lamen dak harei dak taha, lahik bruk ngak tui hatai, abih prein. Tui sa-ai Phạm Xuân Quỳnh, urang jakar danak dak di Kapul athur châu Á, dom drei lamen hu mbaok tame danak dak hu ngak tui hatai dalam labik meteh glai, tabiak truh talei sring saong kateik greik di anek menuac:

 “Urang glang iek lamen oh ba tui gai pasei, oh ba tui mbok kayau, tok pandar pandap mbang piak lamen pambuak bruk. Drei pandar domjalan ngak nan lavik lavik harei hu daong ka lamen gilac veik bruk di nyu, blaoh nyu thau lac nyu brei duah kaya mbang pak halei, eng taong ruak yau habar, sangka gauk yau habar. Lavik lavik harei hatai sahneng di lamen mboh cadu jang ye prein yava lamen hu siam tagok. Pandap kaya menyum mbang ye njauk yau dom hagait nyu caong. Kein laba di lamen hu glaong tagok”.

Dalam 6 bilan tapa Bein Negar Yok Đôn taduan raok tuai damuai mai ravang iek, ba drei tame tour yu lit sinh thai siam mekre haong lamen. Thun 2023, tour ba drei tame ini hu Gah Kỷ lục Việt Nam brei thau lac sa dalam 20 tour gheih abih di Việt Nam. Sa-ai Y Siêm Hđơk, urang tacei ba Bein Negar Yok Đôn lac: Bruk brei angan ini brei mboh bruk oh lac ba mai dom siam mekre tal lamen saong labik glai klo bo daok hu tuai damuai biak takre, pachreih tui:

 “Tour duah thau ka lamen urak ini daok lac tour dui pachreih tuai di dalam saong langiu negar abih, ba mai yaom siam mekre ka dom drei lamen. Dalam bruk duah thau ka lamen ye drei ngak brei tuai mboh anit ranam lamen jang”.

Rilo sinh học, rilo janih athur, phun takik hu, Bein Negr Yok Đôn lac labik hu pandap panda kaya mbang, ia menyum jeng yau dom bruk lagaih piah ka tapon lamen sang di Đắk Lắk randap saong gilac veik haong labik daok meteh glai klo. Tapa nan, peih tabiak jalan ka kol nyu hu khik caga suai lavik, khang kadang saong hu ngak tui hatai jang, gam haong nan jeng ngak tabiak sa janih ravang me-in biak gheih, tok hu di Đắk Lắk./.